പ്രവാസികളുടെ ഡ്രൈവിംഗ് ലൈസൻസിന് നിയന്ത്രണം: ബഹ്റൈൻ പാർലമെന്റ് നിയമഭേദഗതി നിർദ്ദേശം പാസാക്കി
പ്രദീപ് പുറവങ്കര I ബഹ്റൈൻ
മനാമ: ബഹ്റൈൻ സർക്കാറിന്റെ കടുത്ത എതിർപ്പ് അവഗണിച്ചും പ്രവാസികൾക്ക് ഡ്രൈവിംഗ് ലൈസൻസ് അനുവദിക്കുന്നതിന് കർശന നിബന്ധനകൾ ഏർപ്പെടുത്തുന്ന ട്രാഫിക് നിയമത്തിലെ രണ്ട് നിർണ്ണായക ഭേദഗതികൾ ബഹ്റൈൻ പാർലമെന്റ് പാസാക്കി. ലൈസൻസിന്റെ കാലാവധി പ്രവാസിയുടെ താമസ രേഖയുമായി ബന്ധിപ്പിക്കുന്നതും വിദേശ അപേക്ഷകർക്ക് അധിക നിബന്ധനകൾ ഏർപ്പെടുത്താൻ സർക്കാരിന് അധികാരം നൽകുന്നതുമാണ് പുതിയ ഭേദഗതികൾ.
ഒന്നാമത്തെ ഭേദഗതി പ്രകാരം, ഒരു പ്രവാസിക്ക് ലഭിക്കുന്ന ഡ്രൈവിംഗ് ലൈസൻസിന്റെ കാലാവധി അവർക്ക് രാജ്യത്ത് നിയമപരമായി താമസിക്കാൻ അനുമതിയുള്ള കാലയളവ് വരെ മാത്രമായിരിക്കും. രണ്ടാമത്തെ ഭേദഗതി, വിദേശികൾക്ക് ലൈസൻസ് നൽകുന്നതിന് വരുമാനമോ തൊഴിലോ അടിസ്ഥാനമാക്കിയുള്ള അധിക നിബന്ധനകൾ നിശ്ചയിക്കാൻ എക്സിക്യൂട്ടീവ് അതോറിറ്റിക്ക് അനുവാദം നൽകുന്നു.
രാജ്യത്തെ റോഡുകളിലെ അമിത തിരക്ക് കുറയ്ക്കുക എന്ന ലക്ഷ്യത്തോടെയാണ് ഈ പരിഷ്കാരങ്ങളെന്ന് ഭേദഗതിയെ അനുകൂലിക്കുന്ന എംപിമാർ വ്യക്തമാക്കി. പ്രവാസി തൊഴിലാളികളുടെയും സ്വകാര്യ വാഹനങ്ങളുടെയും എണ്ണം വർദ്ധിച്ചുവരുന്നത് ഗതാഗത കുരുക്കിന് കാരണമാകുന്നുണ്ടെന്നും, വിദേശ രാജ്യങ്ങളിലെ മാതൃക പിന്തുടർന്ന് വരുമാനവും താമസ കാലയളവും പരിഗണിച്ച് ലൈസൻസ് നിയന്ത്രിക്കണമെന്നും പാർലമെന്റിൽ വാദമുയർന്നു.
അതേസമയം, ഈ ഭേദഗതികളെ സർക്കാർ എതിർക്കുകയാണ്. നിലവിലെ നിയമപ്രകാരം തന്നെ ലൈസൻസ് ലഭിക്കാനും പുതുക്കാനും സാധുവായ താമസ രേഖ ആവശ്യമാണെന്ന് സർക്കാർ പ്രതിനിധികൾ ചൂണ്ടിക്കാട്ടി. പുതിയ മാറ്റങ്ങൾ നടപ്പിലാക്കുന്നത് ഭരണപരമായ സങ്കീർണ്ണതകൾക്ക് ഇടയാക്കുമെന്നും, പ്രത്യേകിച്ച് ദീർഘകാല താമസ വിസയുള്ളവരുടെ കാര്യത്തിൽ ലൈസൻസ് പുതുക്കുന്നതിന് ഇത് പ്രായോഗിക ബുദ്ധിമുട്ടുകൾ ഉണ്ടാക്കുമെന്നും ആഭ്യന്തര മന്ത്രാലയവും വ്യക്തമാക്കിയിട്ടുണ്ട്. നിലവിലുള്ള നിയമം തന്നെ അധിക നിബന്ധനകൾ ഏർപ്പെടുത്താൻ സർക്കാരിന് അധികാരം നൽകുന്നുണ്ടെന്നും മന്ത്രാലയം ഓർമ്മിപ്പിച്ചു.
നിയമം പ്രാബല്യത്തിൽ വരുന്നതിനായി ഇത് അടുത്ത നിയമനിർമ്മാണ ഘട്ടങ്ങളിലേക്ക് കൈമാറിയിരിക്കുകയാണ്.
sdfsdf
