ഇറാന്റെ നിയമവിരുദ്ധ ആക്രമണങ്ങൾക്കെതിരെ ഐക്യരാഷ്ട്രസഭയിൽ പരാതി നൽകി ബഹ്‌റൈൻ

പ്രദീപ് പുറവങ്കര I ബഹ്റൈൻ

ന്യൂയോർക്ക്: ബഹ്‌റൈൻ ഭൂപ്രദേശത്തിന് നേരെ ഇറാൻ നടത്തുന്ന നിയമവിരുദ്ധമായ ആക്രമണങ്ങളെ അപലപിച്ചും അന്താരാഷ്ട്ര സമൂഹത്തിന്റെ അടിയന്തര ശ്രദ്ധ ആവശ്യപ്പെട്ടും ബഹ്‌റൈൻ ഐക്യരാഷ്ട്രസഭയ്ക്ക് കത്തയച്ചു. യുഎൻ സെക്രട്ടറി ജനറലിനും സെക്യൂരിറ്റി കൗൺസിൽ പ്രസിഡന്റിനും നൽകിയ കത്തിൽ, ഇറാന്റെ ആവർത്തിച്ചുള്ള പ്രകോപനങ്ങൾക്കെതിരെ ശക്തമായ നടപടി വേണമെന്ന് ബഹ്‌റൈൻ ആവശ്യപ്പെട്ടു. ഈ വിഷയത്തിൽ ബഹ്‌റൈൻ അയക്കുന്ന പതിനൊന്നാമത്തെ ഔദ്യോഗിക കത്താണിത്.

2026 ഫെബ്രുവരി 28 മുതൽ ബഹ്‌റൈൻ ലക്ഷ്യമാക്കി വന്ന 194 ബാലിസ്റ്റിക് മിസൈലുകളെയും 523 ഡ്രോണുകളെയും വ്യോമ പ്രതിരോധ സംവിധാനം തടഞ്ഞതായി കത്തിൽ ചൂണ്ടിക്കാട്ടുന്നു. ഇത്തരം ആക്രമണങ്ങളിൽ മാർച്ചിൽ ഒരു മൊറോക്കൻ കരാർ തൊഴിലാളി കൊല്ലപ്പെടുകയും ബഹ്‌റൈൻ, യുഎഇ സൈനികർക്ക് പരിക്കേൽക്കുകയും ചെയ്തിരുന്നു. സിത്രയിലെ ബാപ്‌കോ എനർജീസ് റിഫൈനറി, അൽബ (Alba), ഗൾഫ് പെട്രോകെമിക്കൽ ഇൻഡസ്ട്രീസ് കമ്പനി (GPIC) തുടങ്ങിയ പ്രധാന വ്യവസായ കേന്ദ്രങ്ങൾക്ക് നേരെയും ജനവാസ മേഖലകൾക്ക് നേരെയും ഇറാൻ ബോധപൂർവ്വം ആക്രമണം നടത്തുന്നതായി ബഹ്‌റൈൻ ആരോപിച്ചു.

സെക്യൂരിറ്റി കൗൺസിൽ പ്രമേയം 2817 ഇറാൻ നഗ്നമായി ലംഘിക്കുകയാണെന്ന് ബഹ്‌റൈൻ വ്യക്തമാക്കി. സിവിലിയൻ കേന്ദ്രങ്ങളെ ലക്ഷ്യം വെക്കുന്നത് ജനീവ കൺവെൻഷന്റെയും യുഎൻ ചാർട്ടറിന്റെയും ലംഘനമാണ്. ഈ നിയമവിരുദ്ധ പ്രവൃത്തികൾ വഴി ബഹ്‌റൈനുണ്ടായ എല്ലാ നാശനഷ്ടങ്ങൾക്കും ഇറാൻ പൂർണ്ണമായ നഷ്ടപരിഹാരം നൽകാൻ ബാധ്യസ്ഥമാണെന്ന് കത്തിൽ ഊന്നിപ്പറയുന്നു.

തങ്ങളുടെ പരമാധികാരവും പൗരന്മാരുടെ സുരക്ഷയും സംരക്ഷിക്കാൻ ബഹ്‌റൈന് പൂർണ്ണ അവകാശമുണ്ടെന്ന് കത്തിൽ വ്യക്തമാക്കുന്നു. യുഎൻ ചാർട്ടറിലെ 51-ാം അനുച്ഛേദമനുസരിച്ച്, ഇത്തരം ആക്രമണങ്ങൾക്ക് ആനുപാതികമായ രീതിയിൽ മറുപടി നൽകാൻ രാജ്യത്തിന് അവകാശമുണ്ട്. ഇറാന്റെ നിയമവിരുദ്ധമായ ആക്രമണങ്ങൾ അവസാനിപ്പിക്കാൻ ആവശ്യമായ എല്ലാ നടപടികളും സെക്യൂരിറ്റി കൗൺസിൽ സ്വീകരിക്കണമെന്നും ബഹ്‌റൈൻ ആവശ്യപ്പെട്ടു.