ബഹ്റൈനുമായുള്ള പ്രതിരോധ പങ്കാളിത്തം ശക്തമായി തുടരും: അമേരിക്ക
പ്രദീപ് പുറവങ്കര I ബഹ്റൈൻ
മനാമ: ബഹ്റൈനും അമേരിക്കയും തമ്മിലുള്ള ശക്തമായ സൈനിക-പ്രതിരോധ പങ്കാളിത്തം കൂടുതൽ ഊർജ്ജിതമാക്കുന്നു. യുഎസ് സെൻട്രൽ കമാൻഡ് (CENTCOM) കമാൻഡർ അഡ്മിറൽ ബ്രാഡ് കൂപ്പറിന്റെ ബഹ്റൈൻ സന്ദർശനത്തോടെയാണ് ഇരുരാജ്യങ്ങളും തങ്ങളുടെ സുരക്ഷാ സഹകരണം വീണ്ടും ഉറപ്പിച്ചത്.
പതിറ്റാണ്ടുകളായുള്ള സംയുക്ത പരിശീലനം, സൈനിക ഏകോപനം, തന്ത്രപരമായ താൽപ്പര്യങ്ങൾ എന്നിവയിൽ കെട്ടിപ്പടുത്തതാണ് ഈ ഉറ്റബന്ധമെന്ന് ബഹ്റൈനിലെ യുഎസ് അംബാസഡർ സ്റ്റെഫാനി ഹാലെറ്റ് പ്രസ്താവനയിൽ പറഞ്ഞു. പ്രാദേശികമായ സുരക്ഷാ വെല്ലുവിളികളെ നേരിടുന്നതിൽ ബഹ്റൈൻ ഭരണാധികാരി ഹിസ് മജസ്റ്റി കിംഗ് ഹമദ് ബിൻ ഈസ അൽ ഖലീഫ, കിരീടാവകാശിയും പ്രധാനമന്ത്രിയുമായ ഹിസ് റോയൽ ഹൈനസ് പ്രിൻസ് സൽമാൻ ബിൻ ഹമദ് അൽ ഖലീഫ എന്നിവർ നൽകുന്ന നേതൃത്വത്തെ അമേരിക്കൻ പ്രതിനിധി സംഘം അഭിനന്ദിച്ചു.
ബഹ്റൈൻ ഡിഫൻസ് ഫോഴ്സും (BDF) അമേരിക്കൻ സേനയും തമ്മിലുള്ള അടുത്ത ഏകോപനം രാജ്യത്തിന്റെ പരമാധികാരവും സുരക്ഷയും സംരക്ഷിക്കുന്നതിൽ നിർണ്ണായകമാണെന്ന് അംബാസഡർ ചൂണ്ടിക്കാട്ടി. "ഞങ്ങൾ ഇവിടെയുണ്ട്, നേരത്തെയും ഉണ്ടായിരുന്നു, ഇനിയും ഇവിടെത്തന്നെ തുടരും" എന്ന ശക്തമായ സന്ദേശത്തിലൂടെ ബഹ്റൈന്റെ സുരക്ഷയോടുള്ള വാഷിംഗ്ടണിന്റെ ദീർഘകാല പ്രതിബദ്ധത അവർ ആവർത്തിച്ചു.
മേഖലയിലെ സമാധാനവും സുരക്ഷയും മുൻനിർത്തി സൈനിക സഹകരണം മെച്ചപ്പെടുത്തുന്നതിനുള്ള നിർണ്ണായക ചുവടുവെപ്പായാണ് അഡ്മിറൽ ബ്രാഡ് കൂപ്പറിന്റെ സന്ദർശനം വിലയിരുത്തപ്പെടുന്നത്.
sdsf
