ശാസ്ത്ര പ്രതിഭ പുരസ്കാരങ്ങൾ വിതരണം ചെയ്തു; 80 വിദ്യാർത്ഥികൾക്ക് അംഗീകാരം
പ്രദീപ് പുറവങ്കര I ബഹ്റൈൻ
മനാമ: സയൻസ് ഇന്റർനാഷണൽ ഫോറം (SIF) ബഹ്റൈൻ സംഘടിപ്പിച്ച ശാസ്ത്ര പ്രതിഭാ പരീക്ഷയിലെ (VVM-Sasthra Pratibha Contest) വിജയികൾക്കുള്ള പുരസ്കാരങ്ങൾ വിതരണം ചെയ്തു. ജുഫൈറിലെ ബഹ്റൈൻ സൊസൈറ്റി ഓഫ് എഞ്ചിനീയേഴ്സ് ഹാളിൽ നടന്ന ചടങ്ങിൽ പ്രമുഖ ശാസ്ത്രജ്ഞനും മുംബൈ ഇൻസ്റ്റിറ്റ്യൂട്ട് ഓഫ് ടെക്നോളജി വൈസ് ചാൻസലറുമായ പ്രൊഫ. അനിരുദ്ധ ബി. പണ്ഡിറ്റ് അവാർഡുകൾ സമ്മാനിച്ചു.
ബഹ്റൈനിലെ ഏഴ് സ്കൂളുകളിൽ നിന്നായി 3,500 വിദ്യാർത്ഥികൾ പങ്കെടുത്ത പരീക്ഷയിൽ ഏറ്റവും ഉയർന്ന മാർക്ക് നേടിയ 80 പേരെയാണ് ആദരിച്ചത്. ഇതിൽ 12 വിദ്യാർത്ഥികൾ 'ശാസ്ത്ര പ്രതിഭ' (Sasthra Pratibhas) പുരസ്കാരത്തിന് അർഹരായപ്പോൾ, 68 പേർ എ പ്ലസ് ഗ്രേഡ് കരസ്ഥമാക്കി. ശാസ്ത്ര പ്രതിഭകളായി തിരഞ്ഞെടുക്കപ്പെട്ടവർക്ക് ഇന്ത്യയിലെ പ്രശസ്ത ശാസ്ത്ര ഗവേഷണ കേന്ദ്രങ്ങളായ ഐ.എസ്.ആർ.ഒ, ഡി.ആർ.ഡി.ഒ, ബ്രഹ്മോസ്, ഭാഭ അറ്റോമിക് റിസർച്ച് സെന്റർ എന്നിവ സന്ദർശിക്കാനും അവിടുത്തെ മുതിർന്ന ശാസ്ത്രജ്ഞരുമായി സംവദിക്കാനും അവസരം ലഭിക്കും.
ചടങ്ങ് ഉദ്ഘാടനം ചെയ്തുകൊണ്ട് പ്രൊഫ. അനിരുദ്ധ ബി. പണ്ഡിറ്റ് വിദ്യാർത്ഥികളുമായി സംസാരിച്ചു. രാജ്യത്തിന്റെ വികസനത്തിന് ശാസ്ത്ര സാങ്കേതിക വിദ്യകളെ ദേശീയ കാഴ്ചപ്പാടോടെ പ്രോത്സാഹിപ്പിക്കേണ്ടത് അത്യന്താപേക്ഷിതമാണെന്ന് അദ്ദേഹം പറഞ്ഞു. ശാസ്ത്ര മേഖലയിൽ ഇന്ത്യ അതിവേഗം മുന്നേറിക്കൊണ്ടിരിക്കുകയാണെന്നും ഈ പുരോഗതിയിൽ വിദ്യാർത്ഥികൾക്ക് വലിയ പങ്കുവഹിക്കാനുണ്ടെന്നും അദ്ദേഹം കൂട്ടിച്ചേർത്തു. ചടങ്ങിനോടനുബന്ധിച്ച് നടന്ന 'മീറ്റ് ദ സയന്റിസ്റ്റ്' സെഷനിൽ വിദ്യാർത്ഥികളുടെ ചോദ്യങ്ങൾക്ക് അദ്ദേഹം മറുപടി നൽകി.
സയൻസ് ഇന്റർനാഷണൽ ഫോറം ബഹ്റൈൻ പ്രസിഡന്റ് അനിലാൽ കെ.എസ്. അധ്യക്ഷത വഹിച്ച ചടങ്ങിൽ അഡ്വൈസറി കമ്മിറ്റി ചെയർമാൻ ഡോ. രവി വാര്യർ, വൈസ് ചെയർമാൻ ഡോ. ബാബു രാമചന്ദ്രൻ, ഡോ. വിനോദ് മാണിക്കര എന്നിവർ ആശംസകൾ നേർന്നു. എസ്.ഐ.എഫ് വൈസ് പ്രസിഡന്റ് കെ. ചന്ദ്രശേഖരൻ സ്വാഗതവും ജനറൽ സെക്രട്ടറി പ്രശാന്ത് ധർമ്മരാജ് നന്ദിയും രേഖപ്പെടുത്തി.
afsdf
