ബഹ്റൈനിൽ പുതുക്കിയ ഇന്ധന നിരക്കുകൾ പ്രഖ്യാപിച്ചു; മത്സ്യത്തൊഴിലാളികൾക്ക് സബ്സിഡി തുടരും
പ്രദീപ് പുറവങ്കര I ബഹ്റൈൻ:
ബഹ്റൈനിലെ പ്രാദേശിക വിപണിയിൽ 2026 ഫെബ്രുവരി മാസത്തേക്കുള്ള പുതുക്കിയ ഇന്ധന നിരക്കുകൾ എണ്ണ-പരിസ്ഥിതി മന്ത്രാലയത്തിന് കീഴിലുള്ള ഫ്യുവൽ പ്രൈസ് ഡിറ്റർമിനേഷൻ ആൻഡ് മോണിറ്ററിംഗ് കമ്മിറ്റി പ്രഖ്യാപിച്ചു. ആഗോള ഊർജ്ജ വിപണിയിലെ മാറ്റങ്ങൾ കണക്കിലെടുത്ത് നടത്തുന്ന കൃത്യമായ വിലയിരുത്തലുകളുടെ അടിസ്ഥാനത്തിൽ നിശ്ചയിച്ചിട്ടുള്ള പുതിയ നിരക്കുകൾ ഇന്ന് മുതൽ പ്രാബല്യത്തിൽ വരും. പ്രാദേശിക വിപണിയുടെ ആവശ്യങ്ങളും രാജ്യത്തെ സാമ്പത്തിക സ്ഥിരതയും തമ്മിൽ സന്തുലിതാവസ്ഥ നിലനിർത്തുക എന്ന ലക്ഷ്യത്തോടെയാണ് മന്ത്രാലയം ഈ തീരുമാനമെടുത്തത്.
പുതുക്കിയ വിലവിവരപ്പട്ടിക പ്രകാരം സൂപ്പർ (98) പെട്രോളിന് ലിറ്ററിന് 0.265 ബഹ്റൈനി ദീനാറും പ്രീമിയം (95) പെട്രോളിന് 0.235 ബഹ്റൈനി ദീനാറുമാണ് ഈ മാസത്തെ വില. സാധാരണയായി ഉപയോഗിക്കുന്ന ജെയ്യിദ് (91) പെട്രോളിന് ലിറ്ററിന് 0.218 ദീനാറായിരിക്കും നിരക്ക്. ഡീസൽ വില ലിറ്ററിന് 0.200 ദീനാർ എന്ന് നിശ്ചയിച്ചിട്ടുണ്ട്. എന്നാൽ രാജ്യത്തെ ഭക്ഷ്യസുരക്ഷാ മേഖലയ്ക്ക് കരുത്തുപകരുന്നതിന്റെ ഭാഗമായി ബഹ്റൈനി മത്സ്യത്തൊഴിലാളികൾക്ക് നൽകിവരുന്ന ഡീസൽ സബ്സിഡി മാറ്റമില്ലാതെ തുടരുമെന്ന് അധികൃതർ പ്രത്യേകമായി വ്യക്തമാക്കി.
രാജ്യത്തെ സാമ്പത്തിക താൽപ്പര്യങ്ങളും ജനങ്ങളുടെ ആവശ്യങ്ങളും മുൻനിർത്തി എണ്ണ-പരിസ്ഥിതി മന്ത്രാലയവും മറ്റ് ബന്ധപ്പെട്ട സർക്കാർ വകുപ്പുകളും സംയുക്തമായാണ് ഈ പരിഷ്കരണം നടപ്പിലാക്കിയത്. ഇന്ധന വിതരണ കേന്ദ്രങ്ങളിൽ പുതിയ നിരക്കുകൾ പ്രദർശിപ്പിക്കണമെന്നും ഉപഭോക്താക്കൾക്ക് സുഗമമായ സേവനം ഉറപ്പാക്കണമെന്നും അധികൃതർ നിർദ്ദേശിച്ചു.
xzxzxzxz
