ബഹ്‌റൈനിൽ പുതിയ നിയമങ്ങൾക്കും ഭരണപരിഷ്കാരങ്ങൾക്കും അംഗീകാരം നൽകി രാജകീയ ഉത്തരവുകൾ

പ്രദീപ് പുറവങ്കര I ബഹ്റൈൻ:

ശൂറ കൗൺസിലിന്റെയും പാർലമെന്റിന്റെയും അംഗീകാരത്തെത്തുടർന്ന് സ്വകാര്യ വിദ്യാഭ്യാസ മേഖലയിലും സാമ്പത്തിക ഇടപാടുകളിലും കാതലായ മാറ്റങ്ങൾ വരുത്തുന്ന പുതിയ നിയമങ്ങൾക്കും ഭരണപരമായ പുനഃസംഘടനകൾക്കും ബഹ്‌റൈൻ രാജാവ് ഹമദ് ബിൻ ഈസ അൽ ഖലീഫ അംഗീകാരം നൽകി.

സ്വകാര്യ വിദ്യാഭ്യാസ സ്ഥാപനങ്ങളുമായി ബന്ധപ്പെട്ട 2026-ലെ (4) നമ്പർ നിയമമാണ് ഇതിൽ പ്രധാനപ്പെട്ട ഒന്ന്. ഈ നിയമത്തിലെ വ്യവസ്ഥകൾ ഉടനടി പ്രാബല്യത്തിൽ വരുമെന്നും ഇതിൽ പ്രത്യേകം പരാമർശിക്കാത്ത കാര്യങ്ങളിൽ 2005-ലെ (27) നമ്പർ വിദ്യാഭ്യാസ നിയമത്തിലെ വ്യവസ്ഥകൾ ബാധകമായിരിക്കുമെന്നും ഉത്തരവിൽ വ്യക്തമാക്കുന്നു. നിലവിലുള്ള സ്വകാര്യ വിദ്യാഭ്യാസ സ്ഥാപനങ്ങൾ ഒരു വർഷത്തിനുള്ളിൽ പുതിയ നിയമത്തിന് അനുസൃതമായി തങ്ങളുടെ പ്രവർത്തനങ്ങൾ ക്രമീകരിക്കേണ്ടതുണ്ട്. ഇതോടെ 1998-ലെ പഴയ ഉത്തരവ് പ്രകാരമുള്ള വ്യവസ്ഥകൾ റദ്ദാക്കപ്പെട്ടു. സാമ്പത്തിക മേഖലയിലെ സുരക്ഷ ലക്ഷ്യമിട്ടുള്ള സുരക്ഷിത ഇടപാടുകളുടെ നിയമം (Secured Transactions Law) സംബന്ധിച്ച 2026-ലെ (3) നമ്പർ നിയമത്തിനും രാജാവ് അംഗീകാരം നൽകിയിട്ടുണ്ട്.

ഭരണതലത്തിലും സുപ്രധാനമായ മാറ്റങ്ങളാണ് ഉത്തരവ് വഴി നടപ്പിലാക്കിയിരിക്കുന്നത്. നഗരസഭാ കാര്യ മന്ത്രാലയത്തിൽ നടത്തിയ മാറ്റങ്ങളിലൂടെ മുഹമ്മദ് സാദ് മുഹമ്മദ് അൽ സഹ്ലിയെ നോർത്തേൺ മുനിസിപ്പാലിറ്റി ഡയറക്ടർ ജനറലായും ആലിയ യൂസഫ് യഹ്‌യ ഹസ്സൻ യൂസഫിനെ ക്യാപിറ്റൽ മുനിസിപ്പാലിറ്റി ഡയറക്ടർ ജനറലായും നിയമിച്ചു. കൂടാതെ എഡ്യൂക്കേഷൻ ആൻഡ് ട്രെയിനിംഗ് ക്വാളിറ്റി അതോറിറ്റി (BQA) ബോർഡ് അംഗങ്ങളെയും പുതുക്കി നിശ്ചയിച്ചു. ആമർ ഹസ്സൻ മർഹൂണിന്റെ കാലാവധി നാല് വർഷത്തേക്ക് കൂടി നീട്ടിയതിനൊപ്പം ലിൻഡ മുഹമ്മദ് ജനഹി, സാറ യൂസഫ് ഹാദി എന്നിവരെ പുതിയ അംഗങ്ങളായി നിയമിക്കുകയും ചെയ്തു.

മന്ത്രാലയങ്ങളുടെ പ്രവർത്തനക്ഷമത വർദ്ധിപ്പിക്കുന്നതിനായി സോഷ്യൽ ഡെവലപ്‌മെന്റ് മന്ത്രാലയത്തിന്റെ ഘടനയിൽ മാറ്റം വരുത്തിക്കൊണ്ട് 'ചൈൽഡ് പ്രൊട്ടക്ഷൻ അഫയേഴ്‌സ് ഡയറക്ടറേറ്റ്' പുതുതായി രൂപീകരിച്ചു. സുസ്ഥിര വികസന മന്ത്രാലയവും ഉത്തരവ് പ്രകാരം പുനഃസംഘടിപ്പിച്ചു. ഇനി മുതൽ മന്ത്രാലയത്തിന് കീഴിൽ ഒരു അസിസ്റ്റന്റ് അണ്ടർ സെക്രട്ടറിയും അദ്ദേഹത്തിന് കീഴിലായി 'ഇവാലുവേഷൻ ആൻഡ് കോർഡിനേഷൻ ഡയറക്ടറേറ്റ്', 'കമ്മ്യൂണിക്കേഷൻ ആൻഡ് ഇന്റർനാഷണൽ റിലേഷൻസ് ഡയറക്ടറേറ്റ്' എന്നിവയും പ്രവർത്തിക്കും. ഈ ഉത്തരവുകളെല്ലാം ഔദ്യോഗിക ഗസറ്റിൽ പ്രസിദ്ധീകരിക്കുന്ന തീയതി മുതൽ പ്രാബല്യത്തിൽ വരുന്നതാണ്.