മാസ്റ്ററുടെ കാവ്യഗീതങ്ങളിൽ അലിഞ്ഞ് സമാജം; പി. ഭാസ്കരൻ ജന്മശതാബ്ദി ആഘോഷം വിസ്മയമായി
പ്രദീപ് പുറവങ്കര/മനാമ
മലയാളത്തിന്റെ അനശ്വര കവി പി. ഭാസ്കരൻ മാസ്റ്ററുടെ ജന്മശതാബ്ദി ആഘോഷങ്ങൾക്ക് ബഹ്റൈൻ കേരളീയ സമാജം വേദിയായി. 'ഭൂമിക' സാംസ്കാരിക കൂട്ടായ്മയും സമാജവും സംയുക്തമായി സംഘടിപ്പിച്ച 'ഓർക്കുക വല്ലപ്പോഴും' എന്ന സംഗീത സായാഹ്നം പ്രവാസി മലയാളികൾക്ക് അവിസ്മരണീയമായ അനുഭവമായി മാറി. പ്രശസ്ത ഗായകനും എഴുത്തുകാരനുമായ വി.ടി. മുരളി ചടങ്ങിൽ മുഖ്യാതിഥിയായിരുന്നു.
'മലർമണം പടർന്ന നൂറ് വർഷങ്ങൾ' എന്ന പ്രമേയത്തിൽ അവതരിപ്പിച്ച പരിപാടിയിൽ ഭാസ്കരൻ മാസ്റ്ററുടെ വിഖ്യാത ഗാനങ്ങൾ വി.ടി. മുരളിയും പ്രാദേശിക കലാകാരന്മാരും ചേർന്ന് ആലപിച്ചു. ചലച്ചിത്ര സംഗീത ലോകത്തെ മൺമറഞ്ഞ പ്രതിഭകളെ അനുസ്മരിച്ച വി.ടി. മുരളി, ഭാസ്കരൻ മാസ്റ്റർക്കൊപ്പം പ്രവർത്തിച്ച വിവിധ സംഗീത സംവിധായകരെ കുറിച്ചുള്ള ഓർമ്മകളും പങ്കുവെച്ചു.
ബഹ്റൈൻ കേരളീയ സമാജം പ്രസിഡണ്ട് പി.വി. രാധാകൃഷ്ണപിള്ള അധ്യക്ഷത വഹിച്ച ചടങ്ങിൽ പ്രശസ്ത മജീഷ്യൻ ഗോപിനാഥ് മുതുകാടിന്റെ സാന്നിധ്യം ശ്രദ്ധേയമായി. പരിപാടിയുടെ ഭാഗമായി വി.ടി. മുരളിയെ ആദരിക്കുകയും ചെയ്തു. ഭൂമിക പ്രസിഡണ്ട് ഇ.എ. സലിം, പ്രോഗ്രാം കോഓർഡിനേറ്റർ എസ്.വി. ബഷീർ, സമാജം ജനറൽ സെക്രട്ടറി വർഗീസ് കാരക്കൽ എന്നിവർ സംസാരിച്ചു. നൂറുകണക്കിന് മലയാളികൾ പങ്കെടുത്ത ചടങ്ങിന് ഭൂമിക സെക്രട്ടറി രജിത ടി.കെ. നന്ദി രേഖപ്പെടുത്തി.
adsadsasw
