പൈതൃകവും ദേശീയതയും വിളിച്ചോതി 'സെലിബ്രേറ്റ് ബഹ്റൈൻ' ഫെസ്റ്റിന് തുടക്കം
പ്രദീപ് പുറവങ്കര / മനാമ:
ബഹ്റൈൻ ദേശീയ ദിനാഘോഷങ്ങളുടെ ഭാഗമായി ഇൻഫർമേഷൻ മന്ത്രാലയം സംഘടിപ്പിച്ച അഞ്ചാമത് 'സെലിബ്രേറ്റ് ബഹ്റൈൻ ഫെസ്റ്റിവൽ' റാസ് ഹയ്യാനിലെ ഹെറിറ്റേജ് വില്ലേജിൽ വെച്ച് ഷെയ്ഖ് മുഹമ്മദ് ബിൻ സൽമാൻ ബിൻ ഹമദ് അൽ ഖലീഫ ഉദ്ഘാടനം ചെയ്തു. ഷെയ്ഖ് മുഹമ്മദിനെ ഇൻഫർമേഷൻ മന്ത്രി ഡോ. റംസാൻ ബിൻ അബ്ദുല്ല അൽ നുഐമിയുടെയും മറ്റ് മുതിർന്ന ഉദ്യോഗസ്ഥരുടെയും നേതൃത്വത്തിൽ സ്വീകരിച്ചു.
ബഹ്റൈൻ ദേശീയ ദിനാഘോഷങ്ങളിലെ പൊതുജന പങ്കാളിത്തത്തെ ഷെയ്ഖ് മുഹമ്മദ് പ്രശംസിച്ചു. ഡിസംബർ 4 മുതൽ 28 വരെ നീണ്ടുനിൽക്കുന്ന ഈ വർഷത്തെ മേള, സന്ദർശകർക്ക് നൂതനവും സംവേദനാത്മകവുമായ നിരവധി അനുഭവങ്ങൾ നൽകുന്നുണ്ട്. മൺപാത്രങ്ങൾ, പരമ്പരാഗത കപ്പൽ നിർമ്മാണ മോഡലുകൾ, പനയോല നെയ്ത്ത്, കൊത്തിയെടുത്ത പെട്ടി നിർമ്മാണം, തുണിത്തരങ്ങൾ എന്നിവയിൽ സന്ദർശകർക്ക് പ്രായോഗിക പരിചയം നേടാൻ സഹായിക്കുന്ന പൈതൃക ശിൽപശാലകളും പരിശീലന കോഴ്സുകളും ഇവിടെ സജ്ജീകരിച്ചിട്ടുണ്ട്.
നിരവധി കടകളും സംരംഭകരായ കുടുംബങ്ങളും പങ്കെടുക്കുന്ന ഒരു പരമ്പരാഗത മാർക്കറ്റ് മേളയുടെ പ്രധാന ആകർഷണമാണ്. കുട്ടികൾക്കായി വൈവിധ്യമാർന്ന വിനോദ- വിജ്ഞാന പരിപാടികളുള്ള പ്രത്യേക കോർണർ, രുചികരമായ പരമ്പരാഗത വിഭവങ്ങൾ വിളമ്പുന്ന റെസ്റ്റോറന്റുകൾ എന്നിവയും ഫെസ്റ്റിവലിൽ ഒരുക്കിയിട്ടുണ്ട്.
ിേി
