ബഹ്റൈൻ എന്നത്തേക്കാളും ശക്തം: ഹിസ് മജസ്റ്റി കിംഗ് ഹമദ്
പ്രദീപ് പുറവങ്കര I ബഹ്റൈൻ
മനാമ: രാജ്യം എന്നത്തേക്കാളും ശക്തമായ ഐക്യത്തിലാണെന്നും ജനങ്ങൾ ഒരൊറ്റ കൊടിക്കീഴിൽ അണിനിരന്നിരിക്കുകയാണെന്നും സായുധ സേനയുടെ സുപ്രീം കമാൻഡർ കൂടിയായ ഹിസ് മജസ്റ്റി കിംഗ് ഹമദ് ബിൻ ഈസ അൽ ഖലീഫ പ്രസ്താവിച്ചു. റോയൽ ബഹ്റൈനി എയർഫോഴ്സ് (RBAF), എയർ ഡിഫൻസ് യൂണിറ്റുകൾ എന്നിവയുടെ പ്രവർത്തന സജ്ജതയും ശേഷിയും നേരിട്ട് വിലയിരുത്താൻ നടത്തിയ സന്ദർശനത്തിനിടെയായിരുന്നു അദ്ദേഹത്തിന്റെ പ്രതികരണം.
നാഷണൽ സെക്യൂരിറ്റി അഡൈ്വസറും റോയൽ ഗാർഡ് കമാൻഡറുമായ ലെഫ്റ്റനന്റ് ജനറൽ ഷെയ്ഖ് നാസർ ബിൻ ഹമദ് അൽ ഖലീഫ, കേണൽ ഷെയ്ഖ് ഖാലിദ് ബിൻ ഹമദ് അൽ ഖലീഫ, ചീഫ് ഓഫ് സ്റ്റാഫ് ലെഫ്റ്റനന്റ് ജനറൽ ദിയാബ് ബിൻ സഖർ അൽ നുഐമി എന്നിവർ ചേർന്നാണ് രാജാവിനെ സ്വീകരിച്ചത്. സന്ദർശന വേളയിൽ ബഹ്റൈൻ ഡിഫൻസ് ഫോഴ്സിന്റെ (BDF) പക്കലുള്ള ലോകത്തിലെ തന്നെ അത്യാധുനിക യുദ്ധവിമാനങ്ങൾ ഹിസ് മജസ്റ്റി പരിശോധിക്കുകയും രാജ്യത്തിന്റെ അതിർത്തികളും ആകാശവും സംരക്ഷിക്കുന്നതിൽ സൈന്യം കാണിക്കുന്ന അർപ്പണബോധത്തെ പ്രശംസിക്കുകയും ചെയ്തു.
ജ്ഞാനത്തിലും മിതത്വത്തിലും അധിഷ്ഠിതമായ നയങ്ങളിൽ ബഹ്റൈൻ എന്നും ഉറച്ചുനിൽക്കുമെന്ന് അദ്ദേഹം വ്യക്തമാക്കി. മേഖലയിലെ സമാധാനത്തിനും സുരക്ഷയ്ക്കുമായി അറബ് രാജ്യങ്ങളുമായും അന്താരാഷ്ട്ര പങ്കാളികളുമായും ഉള്ള ബന്ധം കൂടുതൽ ശക്തമാക്കും. പൗരന്മാരുടെ സുരക്ഷ ഉറപ്പാക്കുന്നതിലും രാജ്യത്തിന്റെ വികസന പ്രക്രിയ സംരക്ഷിക്കുന്നതിലും സൈന്യം പുലർത്തുന്ന ഉയർന്ന അച്ചടക്കത്തെയും പ്രൊഫഷണലിസത്തെയും രാജാവ് അഭിനന്ദിച്ചു. എല്ലാ റാങ്കുകളിലുമുള്ള സൈനികർക്കും ഉദ്യോഗസ്ഥർക്കും തന്റെ ആശംസകൾ അറിയിച്ച അദ്ദേഹം, രാജ്യസേവനത്തിൽ അവർക്ക് കൂടുതൽ വിജയങ്ങൾ നേരാൻ പ്രാർത്ഥിക്കുന്നതായും പറഞ്ഞു.
sdfsf
