ഈദ് അവധി ദിവസങ്ങളിൽ ദുബൈയിൽ സന്ദർശക പ്രവാഹം
ദുബൈ : ഈദ് അവധി ദിനങ്ങളിൽ ദുബൈയിൽ വൻ സന്ദർശക പ്രവാഹമാണ് ഉണ്ടായതെന്ന് ദുബൈ ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് (ദുബൈ എമിഗ്രേഷൻ) അധിക്യതർ പറഞ്ഞു. ഈ ദിനങ്ങളിൽ കര-നാവിക- വ്യോമ മാർഗങ്ങളിലൂടെ ദുബൈയിലേക്ക് വരുകയും പോകുകയും ചെയ്തത് 815,725 പേരാണെന്ന് ദുബൈ എമിഗ്രേഷൻ കണക്കുകൾ പറയുന്നു.
ആഘോഷങ്ങളുടെ നാടായ ദുബൈയിലേക്ക് ലോകത്തിന്റെ വിവിധ ഭാഗങ്ങളിൽ നിന്ന് ഈദുൽ ഫിതർ ആഘോഷിക്കാൻ എത്തിയവരെ മികച്ച രീതിയിലാണ് അധിക്യതർ രാജ്യത്തേയ്ക്ക് സ്വാഗതം ചെയ്തത്. മധുര പലഹാരങ്ങൾ നൽകി ഈദ് ദിനത്തിൽ ജനറൽ ഡയറക്ടറേറ്റ് ഓഫ് റസിഡൻസി ആന്റ് ഫോറീനേഴ്സ് അഫയേഴ്സ് സഞ്ചാരികളെ വരവേറ്റു. ജി.ഡി.ആർ.എഫ്.എ ദുബൈ മേധാവി മേജർ ജനറൽ മുഹമ്മദ് അഹ്മ് അൽ മറിയും മറ്റു ഉദ്യോഗസ്ഥരും പെരുന്നാൾ ദിനത്തിൽ ദുബൈ രാജ്യാന്തര വിമാനത്താവളം സന്ദർശിക്കുന്നു. ഈ മാസം 14 മുതൽ 17 വരെയുള്ള അവധി ദിനങ്ങളിൽ 21,508 എൻട്രി, റസിഡൻസ് പെർമിറ്റുകൾ വകുപ്പ് ഇഷ്യു ചെയ്തതായി അൽ മറി അറിയിച്ചു.
