ഫോൾഡബിൾ ഫോണുകളിൽ വിപ്ലവത്തിനൊരുങ്ങി സാംസങ്; ഗാലക്സി ഇസഡ് ഫോൾഡ് 8 വരുന്നു
ഷീബ വിജയൻ
സ്മാർട്ട്ഫോൺ വിപണിയിൽ തങ്ങളുടെ ആധിപത്യം ഉറപ്പിക്കാൻ പുതിയ ഫോൾഡബിൾ ഫോണുകളുമായി സാംസങ് എത്തുന്നു. ഇത്തവണ കൂടുതൽ വീതിയുള്ള ഡിസ്പ്ലേയോട് കൂടിയ 'വൈഡ്' മോഡലാണ് സാംസങ്ങിന്റെ പ്രധാന ആകർഷണം. വരാനിരിക്കുന്ന ഗാലക്സി അൺപാക്ക്ഡ് ഇവന്റിൽ വെച്ച് ഗാലക്സി ഇസഡ് ഫോൾഡ് 8-നൊപ്പം ഈ പുതിയ വൈഡ് മോഡലും കമ്പനി ഔദ്യോഗികമായി അവതരിപ്പിക്കും.
ജൂലൈ 22-ന് ലണ്ടനിൽ വെച്ചാണ് സാംസങ്ങിന്റെ ഈ പുത്തൻ അത്ഭുതങ്ങൾ പുറത്തിറങ്ങുന്നത്. സാംസങ് ഫോണുകളുടെ വലിയ പ്രത്യേകതയായിരുന്ന 'എസ് പെൻ' (S Pen) വീണ്ടും ഫോൾഡബിൾ ഫോണുകളിലേക്ക് മടങ്ങിവരുന്നു എന്നതാണ് മറ്റൊരു സുപ്രധാന വാർത്ത. ഇത് ഫോണിൽ എഴുതുന്നതിനും വരയ്ക്കുന്നതിനും ഉപയോക്താക്കൾക്ക് കൂടുതൽ സൗകര്യമൊരുക്കും. ചൈനീസ് ബ്രാൻഡുകളിൽ നിന്നുള്ള കടുത്ത മത്സരവും ആപ്പിളിന്റെ ആദ്യ ഫോൾഡബിൾ ഐഫോണിന്റെ വരവും മുൻകൂട്ടി കണ്ടാണ് സാംസങ് ഇത്തരമൊരു നീക്കം നടത്തുന്നത്.
പുതിയ ഫോണുകൾക്കൊപ്പം ഗാലക്സി വാച്ചിന്റെ പുതിയ പതിപ്പുകളും ഈ ചടങ്ങിൽ പുറത്തിറക്കിയേക്കും. കഴിഞ്ഞ വർഷം ന്യൂയോർക്കിൽ വെച്ചാണ് സാംസങ് പുതിയ മോഡലുകൾ അവതരിപ്പിച്ചിരുന്നതെങ്കിൽ ഇത്തവണ ലണ്ടനെയാണ് വേദിയായി തിരഞ്ഞെടുത്തത്. ഫെബ്രുവരിയിൽ പുറത്തിറങ്ങിയ സാംസങ് എസ് 26 സീരീസിന് ലഭിച്ച വൻ സ്വീകാര്യതയ്ക്ക് പിന്നാലെ ഫോൾഡബിൾ വിപണിയും കീഴടക്കാമെന്ന ആത്മവിശ്വാസത്തിലാണ് കമ്പനി.
dsfdfsdf
