യു.എ.ഇയിലെ ഇന്ത്യൻ സ്കൂൾ കലോത്സവത്തിന് ഇന്ന് തിരിതെളിയും
ദുബൈ : യു.എ.ഇയിലെ സ്കൂൾ കലോത്സവത്തിന് രാവിലെ 10 മണിക്ക് റാസൽഖൈമ ഇന്ത്യൻ സ്കൂളിൽ നടനും എം.പിയുമായ ഇന്നസെന്റ് തിരിതെളിയിക്കും. റാസൽഖൈമ, ഫുജൈറ എമിറേറ്റുകളിലെ പത്തു സ്കൂളുകളിൽ നിന്നായി 540 വിദ്യാർത്ഥികൾ വിവിധ മത്സരങ്ങളിൽ പങ്കെടുക്കും.
ഇന്ത്യൻ സ്കൂളിലെ രണ്ട് വേദികളിലായി 11 ഇനങ്ങളിലാണ് മത്സരം. ഇതിൽ എട്ട് ഗ്രൂപ്പ് മത്സരങ്ങളും ഒന്പത് വ്യക്തിഗത ഇനങ്ങളുമാണ്. കേരള സ്കൂൾ കലോത്സവങ്ങൾ നിയന്ത്രിച്ച 11 പേരടങ്ങുന്ന പാനലായിരിക്കും മത്സരങ്ങൾ നിയന്ത്രിക്കുക.
നാല് ലക്ഷം രൂപയുടെ സമ്മാനങ്ങളാണ് മത്സര വിജയകളെ കാത്തിരിക്കുന്നത്. ഏറ്റവും കൂടുതൽ പോയിന്റ് നേടുന്ന സ്കൂളിന് സ്വർണക്കപ്പും നൽകും. യു.എ.ഇയുടെ ചരിത്രത്തിലാദ്യമാണ് ഇത്രയും വലിയ സമ്മാന തുകയൊരുക്കി കലോത്സവം സംഘടിപ്പിക്കുന്നത്. വിവിധ എമിറേറ്റുകളിലെ മത്സരങ്ങൾക്കുശേഷം ഡിസംബർ 2ന് ദുബൈയിൽ നടക്കുന്ന മെഗാ ഫൈനലിലായിരിക്കും കലാപ്രതിഭകളെ തെരഞ്ഞെടുക്കുക. ശനിയാഴ്ച ഉമ്മുൽഖുവൈൻ, അജ്മാൻ എമിറേറ്റിലെകുട്ടികൾക്കായുള്ള മത്സരവും ഇന്ത്യൻ സ്കൂളിൽ നടക്കും.


