ഷാർജ രാജ്യാന്തര പുസ്തകോത്സവം ഇന്ന് സമാപിക്കും
ഷാർജ : ഷാർജ രാജ്യാന്തര പുസ്തകോത്സവം ഇന്ന് സമാപിക്കും. ശാസ്ത്രവും സാഹിത്യവും ചരിത്രവും അലതല്ലിയ വിജ്ഞാനതീരത്ത് മലയാളവും ലോകത്തിന്റെ ആദരമേറ്റുവാങ്ങുന്നു. ഇന്ത്യയ്ക്കു പുറത്ത് ഏറ്റവും കൂടുതൽ ഇന്ത്യക്കാർ ഒത്തുകൂടിയ അക്ഷരോൽസവം എന്ന അഭിമാന മുഹൂർത്തം സമ്മാനിച്ചാണ് മേള പൂർണമാകുന്നത്. 60 രാജ്യങ്ങളിൽനിന്ന് 1650 പ്രദർശകർ പങ്കെടുത്തു. ബഹുഭാഷാ പണ്ധിതനായ യു.എ.ഇ സുപ്രീം കൗൺസിൽ അംഗവും ഷാർജ ഭരണാധികാരിയുമായ ഷെയ്ഖ് ഡോ. സുൽത്താൻ ബിൻ മുഹമ്മദ് അൽ ഖാസിമി ഷാർജയെ അറബ് ലോകത്തിന്റെ സാംസ്കാരിക തലസ്ഥാനമായി വളർത്തിയെടുത്തു കഴിഞ്ഞു.
എം.ടി. വാസുദേവൻ നായർ, സി. രാധാകൃഷ്ണൻ, സാറാ ജോസഫ്, സി.വി. ബാലകൃഷ്ണൻ, ഏഴാച്ചേരി രാമചന്ദ്രൻ, ആലങ്കോട് ലീലാകൃഷ്ണൻ, അനിൽ പനച്ചൂരാൻ, വി.ജെ. ജയിംസ്, കെ. ജയകുമാർ, ജോർജ് ഓണക്കൂർ, സംഗീത ശ്രീനിവാസൻ, മനു ജോസഫ്, ചലച്ചിത്ര താരങ്ങളായ ഇന്നസെന്റ്, അനൂപ് മേനോൻ, റിമകല്ലിങ്കൽ, സംവിധായകരായ കമൽ, ആഷിഖ് അബു, സംഗീത സംവിധായകൻ എം. ജയചന്ദ്രൻ, ശാസ്ത്രജ്ഞൻ നന്പി നാരായണൻ തുടങ്ങിയവർ എത്തി. എഴുത്തുകാരനും കാനഡയിലെ ഇന്ത്യൻ ഹൈക്കമ്മീഷണറുമായ വികാസ് സ്വരൂപ്, തമിഴ് സാഹിത്യത്തിലെ പ്രമുഖൻ എസ്. രാമകൃഷ്ണൻ, യുവ ഇന്ത്യൻ ഇംഗ്ലിഷ് എഴുത്തുകാരിൽ ശ്രദ്ധേയരായ പ്രീതി ഷേണായ്, തുടങ്ങിയവരും ശ്രദ്ധേയ സാന്നിധ്യങ്ങളായി.
15 ലക്ഷത്തിലേറെ പുസ്തകങ്ങൾ, 2600 സാഹിത്യ സദസ്സുകൾ, ലോകപ്രശസ്ത സാഹിത്യ പ്രതിഭകളുമായുള്ള മുഖാമുഖം, ചർച്ചകൾ, പുസ്തകപ്രകാശനങ്ങൾ എന്നിവ മേളയെ വ്യത്യസ്തമാക്കി.


