രണ്ട് ദിവസം മുന്പ് ബോർഡിംഗ് പാസ് ലഭിക്കാനുള്ള സൗകര്യമൊരുക്കി സൗദി എയർലൈൻസ്
റിയാദ് : സൗദി എയർലൈൻസിൽ യാത്ര ചെയ്യുന്നവർക്ക് ഇനി രണ്ടു ദിവസം മുന്പ് ബോർഡിംഗ് പാസ് ലഭിക്കാനുള്ള സൗകര്യം ഉണ്ടാകും. ഇന്നലെയാണ് ഈ സേവനംഎയർലൈൻസ്‌ ആരംഭിച്ചത്. യാത്ര പുറപ്പെടുന്നതിനു നാൽപ്പത്തിയെട്ട് മണിക്കൂർ മുന്പ് ബോർഡിംഗ് പാസ് ഇഷ്യൂ ചെയ്യാനുള്ള സൗകര്യമാണ് സൗദി അറേബ്യൻ എയർലൈൻസ് ഒരുക്കിയിരിക്കുന്നത്. സെൽഫ് സർവ്‍വീസ് വഴിയാണ് ഈ സേവനം ലഭ്യമാകുക.
ഓൺലൈൻ വഴിയോ സൗദി എയർ ലൈൻസ് ഏർപ്പെടുത്തിയിട്ടുള്ള പ്രത്യേക മെഷീനുകൾ വഴിയോ ഈ സേവനം ലഭിക്കും. ഇതുവരെ ഇരുപത്തിനാല് മണിക്കൂർ മുന്പ് മാത്രമേ ബോർഡിംഗ് പാസ് ഇഷ്യൂ ചെയ്യാൻ സാധിക്കുമായിരുന്നുള്ളൂ. ഓൺലൈൻ വഴിയുള്ള ബുക്കിങ്ങും, ബോർഡിംഗ് പാസ് ഇഷ്യൂ ചെയ്യുന്നതും വൻതോതിൽ വർദ്ധിച്ച സാഹചര്യത്തിലാണ് ഈ മാറ്റമെന്ന് സൗദി എയർലൈൻസ് ഡെപ്യൂട്ടി ഡയരക്ടർ ജനറൽ അബ്ദുറഹ്മാൻ അൽ തയ്യിബ് പറഞ്ഞു.
അതേസമയം ആഭ്യന്തര വിമാനക്കന്പനിയായ ഫ്ലൈ അദീൽ ഈ വർഷാവസാനത്തോടെ അന്ത്രാരാഷ്ട്ര സർവ്‍വീസുകൾ ആരംഭിക്കുമെന്ന് മാനെജ്മെന്റ് അറിയിച്ചു. വർഷത്തിൽ മുപ്പത് ലക്ഷത്തിലധികം സീറ്റുകളാണ് കന്പനി ലക്ഷ്യമിടുന്നത്. ഈ സേവനത്തിനായി എട്ടു പുതിയ വിമാനങ്ങൾ കന്പനി വാങ്ങുമെന്നും മാനെജ്മെന്റ് അറിയിച്ചു.
