തുർക്കിയിൽ 3 ജിഗാവാട്ട് കാറ്റാടിപ്പാടം; കരാർ ഒപ്പുവെച്ച് സൗദി അറേബ്യയും തുർക്കിയും

ശാരിക

ഈ വർഷമാദ്യം ധാരണയായ 5 ജിഗാവാട്ട് (GW) പുനരുപയോഗ ഊർജ്ജ പദ്ധതിയുടെ ഭാഗമായി, തുർക്കിയിൽ 3 ജിഗാവാട്ടിന്റെ കാറ്റാടി ഊർജ്ജ പദ്ധതികൾ മുന്നോട്ട് കൊണ്ടുപോകുന്നതിനുള്ള കരാറിൽ സൗദി അറേബ്യയും തുർക്കിയും ഒപ്പുവെച്ചു.

സൗദി അറേബ്യയുടെ 'അക്വ പവർ' (ACWA Power) നേതൃത്വം നൽകുന്ന ഈ പദ്ധതിയിൽ രണ്ട് ഘട്ടങ്ങളാണുള്ളത്. ആദ്യ ഘട്ടത്തിൽ ശിവാസ് കരമാൻ (Karaman) എന്നിവിടങ്ങളിൽ 2 ജിഗാവാട്ട് സൗരോർജ്ജ പദ്ധതികളും, രണ്ടാം ഘട്ടത്തിൽ 3 ജിഗാവാട്ട് കാറ്റാടി ഊർജ്ജ പദ്ധതികളുമാണ് ഉൾപ്പെടുന്നത്. നിലവിലുള്ള കാറ്റാടിപ്പാടങ്ങൾ വികസിപ്പിക്കുന്നതിന് പകരം, ആസൂത്രണം ചെയ്ത പുതിയ ഘട്ടം വേഗത്തിലാക്കാനാണ് പുതിയ കരാറിലൂടെ ലക്ഷ്യമിടുന്നത്.

പുതിയ ഉഭയകക്ഷി കരാർ പ്രകാരം നിർമ്മിക്കുന്ന കാറ്റാടി ഊർജ്ജ ശേഷി, തുർക്കിയുടെ നിലവിലുള്ള ആകെ കാറ്റാടി വൈദ്യുതി ഉൽപ്പാദന ശേഷിയുടെ 20 ശതമാനത്തിന് തുല്യമാണ്. സൗദി അറേബ്യയുമായുള്ള തന്ത്രപരമായ ഊർജ്ജ സഹകരണം കൂടുതൽ ആഴത്തിലാക്കുകയാണെന്ന് തുർക്കി ഊർജ്ജ മന്ത്രി അൽപർസ്ലാൻ ബയ്റക്തർ പറഞ്ഞു. പ്രതിവർഷം 10 ജിഗാവാട്ട് പുതിയ ലോ-കാർബൺ വൈദ്യുതി ശേഷി കൈവരിക്കുക എന്നതാണ് തുർക്കി സർക്കാരിന്റെ ലക്ഷ്യം.

ആഗോള എണ്ണ ശക്തിയാണെങ്കിലും ബദൽ ഊർജ്ജ മേഖലയിൽ വലിയ ലക്ഷ്യങ്ങളാണ് സൗദി അറേബ്യയ്ക്കുള്ളത്. കിരീടാവകാശി മുഹമ്മദ് ബിൻ സൽമാൻ നേതൃത്വം നൽകുന്ന 'വിഷൻ 2030' പദ്ധതിയുടെ ഭാഗമായി, 2030-ഓടെ രാജ്യത്തെ വൈദ്യുതിയുടെ 50 ശതമാനത്തോളം പുനരുപയോഗ സ്രോതസ്സുകളിൽ നിന്ന് ഉൽപ്പാദിപ്പിക്കാനും 2060-ഓടെ നെറ്റ്-സീറോ കാർബൺ ബഹിർഗമനം കൈവരിക്കാനും റിയാദ് ലക്ഷ്യമിടുന്നു.

ഇതേ പദ്ധതിയുടെ സൗരോർജ്ജ ഘട്ടം ഈ വർഷമാദ്യം പ്രഖ്യാപിച്ചിരുന്നു. ശിവാസിലും കരമാനിലുമായി 2 ജിഗാവാട്ട് ശേഷിയുള്ള രണ്ട് പദ്ധതികൾക്കായി ഏകദേശം 2 ബില്യൺ ഡോളറാണ് സൗദി അറേബ്യ നിക്ഷേപിക്കുന്നത്. ഇത് പൂർത്തിയാകുന്നതോടെ ഏകദേശം 21 ലക്ഷം വീടുകളുടെ വൈദ്യുതി ആവശ്യങ്ങൾ നിറവേറ്റാൻ സാധിക്കും. തങ്ങളുടെ ഊർജ്ജ മേഖലയിലെ ഏറ്റവും പ്രധാനപ്പെട്ട വിദേശ നേരിട്ടുള്ള നിക്ഷേപങ്ങളിൽ ഒന്നായാണ് ഇതിനെ കാണുന്നതെന്നും, അന്താരാഷ്ട്ര ധനകാര്യ സ്ഥാപനങ്ങളുടെ വായ്പയടക്കം പൂർണ്ണമായും വിദേശ ധനസഹായത്തോടെയാണ് ഇത് നടപ്പിലാക്കുന്നതെന്നും മന്ത്രി ബയ്റക്തർ നേരത്തെ വ്യക്തമാക്കിയിരുന്നു.