കലാപരിപാടികൾക്ക് മുൻകൂർ ലൈസൻസ് നിർബന്ധം; ഒമാനിൽ കർശന നിർദേശവുമായി മന്ത്രാലയം
ഷീബ വിജയൻ
മസ്കത്ത്: ഒമാനിൽ വ്യക്തികളോ വിവിധ സംഘടനകളോ ഏതെങ്കിലും തരത്തിലുള്ള കലാപരിപാടികൾ സംഘടിപ്പിക്കുന്നതിന് മുൻപായി ആവശ്യമായ ഔദ്യോഗിക അനുമതികളും ലൈസൻസിങ് നടപടികളും പൂർണ്ണമായി പൂർത്തിയാക്കണമെന്ന് സാംസ്കാരിക, കായിക, യുവജന മന്ത്രാലയം കർശന നിർദേശം നൽകി. കലാപരമായ പ്രവർത്തനങ്ങൾ നടത്താൻ ആഗ്രഹിക്കുന്ന വ്യക്തികൾക്കും സ്ഥാപനങ്ങൾക്കുമായി പുറപ്പെടുവിച്ച പുതിയ സർക്കുലറിലാണ് മന്ത്രാലയം ഇക്കാര്യങ്ങൾ വ്യക്തമാക്കിയത്.
രാജ്യത്ത് ഏതൊരു കലാപരിപാടിയും നടത്തുന്നതിന് മുൻപ് ഡയറക്ടറേറ്റ് ജനറൽ ഓഫ് ആർട്സുമായി സംഘാടകർ മുൻകൂട്ടി ഏകോപനം നടത്തേണ്ടതുണ്ട്. കൂടാതെ ബന്ധപ്പെട്ട അധികാരികളിൽ നിന്നുള്ള സുരക്ഷാ, നിയന്ത്രണ അനുമതികൾ വാങ്ങി സൂക്ഷിക്കുകയും വേണം. മന്ത്രാലയം അനുവദിക്കുന്ന ലൈസൻസിങ് സേവനങ്ങൾ ഒമാൻ സർക്കാരിന്റെ ഔദ്യോഗിക ഇലക്ട്രോണിക് പോർട്ടലായ ‘മുൻജിസ്’ (Munjez) വഴി പൊതുജനങ്ങൾക്ക് ലഭ്യമാണെന്നും അധികൃതർ അറിയിച്ചു.
അനുവദിക്കപ്പെട്ട ഔദ്യോഗിക ലൈസൻസുകളിൽ രേഖപ്പെടുത്തിയിട്ടുള്ള പേരുകളും പരിപാടിയുടെ വിവരങ്ങളും സംഘാടകർ കൃത്യമായി പാലിക്കേണ്ടതുണ്ട്. എല്ലാ കലാപരിപാടികളും മന്ത്രാലയം അംഗീകരിച്ചിട്ടുള്ള ചട്ടങ്ങൾക്കും രേഖകൾക്കും അനുസൃതമായാണ് നടക്കുന്നതെന്ന് ഉറപ്പുവരുത്തേണ്ട പൂർണ്ണ ഉത്തരവാദിത്തം സംഘാടകർക്കാണെന്ന് സർക്കുലറിൽ പറയുന്നു. ലൈസൻസ് ഇല്ലാതെ കലാപരിപാടികൾ സംഘടിപ്പിക്കുന്നത് ഒമാനിലെ നിലവിലുള്ള നിയമങ്ങളുടെ ലംഘനമായി കണക്കാക്കും. നിലവിൽ മന്ത്രാലയത്തിന്റെ അനുമതിയില്ലാതെ ഇത്തരം കലാപ്രവർത്തനങ്ങൾ നടത്തുന്ന ഗ്രൂപ്പുകൾ ഉണ്ടെങ്കിൽ അവർ എത്രയും വേഗം തങ്ങളുടെ പദവി നിയമവിധേയമാക്കണമെന്നും ആവശ്യമായ ലൈസൻസിങ് നടപടികൾ വേഗത്തിൽ പൂർത്തിയാക്കണമെന്നും മന്ത്രാലയം കർശന മുന്നറിയിപ്പ് നൽകി.
asaqwaqswd
