ലക്നോവിൽ പാർക്കിംഗ് തർക്കം ചോരക്കളമായി: മൂന്ന് പേരെ വെടിവെച്ചു കൊന്നു; പ്രതി കസ്റ്റഡിയിൽ
ശാരിക
ലക്നോ: ഉത്തർപ്രദേശിലെ ലക്നോവിൽ കാർ പാർക്കിംഗിനെച്ചൊല്ലിയുണ്ടായ തർക്കത്തിനിടെ മൂന്ന് പേർ വെടിയേറ്റ് മരിച്ചു. ശിവാജി തിവാരി (62), ശിവേന്ദ്ര തിവാരി (55), സുയാഷ് തിവാരി (30) എന്നിവരാണ് കൊല്ലപ്പെട്ടത്. സംഭവത്തിൽ പ്രതിയായ ഋഷഭ് ശുക്ല (30) എന്ന യുവാവിനെ പൊലീസ് സംഭവസ്ഥലത്തുവെച്ചുതന്നെ അറസ്റ്റ് ചെയ്തു. തിങ്കളാഴ്ച രാവിലെ 10:30-ഓടെയാണ് നാടിനെ നടുക്കിയ ദുരന്തമുണ്ടായത്.
അയൽവാസികളായ സേവാ തിവാരിയുടെ കുടുംബവും ഋഷഭ് ശുക്ലയുടെ കുടുംബവും തമ്മിൽ വിജനമായി കിടക്കുന്ന സ്ഥലത്ത് വാഹനം പാർക്ക് ചെയ്യുന്നതുമായി ബന്ധപ്പെട്ട് ഏറെ നാളായി തർക്കം നിലനിന്നിരുന്നു. ഈ സ്ഥലത്ത് വാഹനം പാർക്ക് ചെയ്തത് ശിവാജി, ശിവേന്ദ്ര, സുയാഷ് എന്നിവർ ചോദ്യം ചെയ്തതിനെത്തുടർന്ന് തർക്കം രൂക്ഷമാകുകയായിരുന്നു. വാക്കുതർക്കത്തിനിടെ പ്രകോപിതനായ ഋഷഭ് ശുക്ല കയ്യിലുണ്ടായിരുന്ന തോക്കെടുത്ത് മൂന്ന് പേർക്ക് നേരെയും വെടിയുതിർക്കുകയായിരുന്നു.
ഗുരുതരമായി പരിക്കേറ്റ ഇവരെ ഉടനടി ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. രണ്ടുപേർ സംഭവസ്ഥലത്തു വെച്ചും ഒരാൾ ആശുപത്രിയിൽ ചികിത്സയിലിരിക്കെയുമാണ് മരണമടഞ്ഞത്. കൊല്ലപ്പെട്ടവരിൽ രണ്ടുപേർ പിതാവും മകനുമാണെന്ന് പൊലീസ് സ്ഥിരീകരിച്ചു. വിവരമറിഞ്ഞ ഉടൻ തന്നെ സ്ഥലത്തെത്തിയ പൊലീസ് പ്രതിയായ ഋഷഭ് ശുക്ലയെ കസ്റ്റഡിയിലെടുക്കുകയും ഇയാളിൽ നിന്ന് തോക്ക് പിടിച്ചെടുക്കുകയും ചെയ്തു. കൊല്ലപ്പെട്ടവരുടെ കുടുംബത്തിന്റെ പരാതിയുടെ അടിസ്ഥാനത്തിൽ കേസെടുത്ത പൊലീസ് തുടർനടപടികളും അന്വേഷണവും ശക്തമാക്കിയിട്ടുണ്ട്.
