ഇന്ത്യൻ ഫോൺ വിപണിയിൽ ചൈനീസ് കമ്പനികൾക്ക് കനത്ത തിരിച്ചടി; വിഹിതം എട്ടുവർഷത്തെ താഴ്ന്ന നിരക്കിൽ, നേട്ടമുണ്ടാക്കി തദ്ദേശീയ ബ്രാൻഡുകൾ
ശാരിക
ന്യൂഡൽഹി: ഇന്ത്യൻ സ്മാർട്ട്ഫോൺ വിപണിയിൽ ചൈനീസ് ബ്രാൻഡുകളുടെ സാന്നിധ്യം കുത്തനെ ഇടിഞ്ഞു. ജൂലൈ-സെപ്റ്റംബർ പാദത്തിൽ 67 മുതൽ 68 ശതമാനം വരെയായി ഇവയുടെ വിഹിതം കുറഞ്ഞു. കഴിഞ്ഞ എട്ട് വർഷത്തിനിടയിലെ ഏറ്റവും കുറഞ്ഞ നിരക്കാണിത്. ചൈനീസ് ബ്രാൻഡുകളുടെ വിൽപ്പനയിലെ പ്രധാന ശക്തിയായിരുന്ന ബജറ്റ് സ്മാർട്ട്ഫോൺ മോഡലുകളുടെ ഉൽപ്പാദനം വെട്ടിക്കുറച്ചതാണ് ഇതിന് പ്രധാന കാരണമായത്. മെമ്മറി ചിപ്പുകൾക്ക് റെക്കോർഡ് വിലവർധനവ് ഉണ്ടായതാണ് കമ്പനികളെ ഇത്തരം ഒരു തീരുമാനത്തിലേക്ക് നയിച്ചത്.
ടെക്നോളജി മാർക്കറ്റ് റിസർച്ച് സ്ഥാപനമായ ഒംഡിയയുടെ (Omdia) കണക്കുകൾ പ്രകാരം കഴിഞ്ഞ പാദത്തിൽ 68 ശതമാനമായിരുന്നു ചൈനീസ് ബ്രാൻഡുകളുടെ വിഹിതം. തൊട്ടുമുൻപത്തെ പാദത്തിൽ ഇത് 71 ശതമാനവും ഒരു വർഷം മുൻപ് 75 ശതമാനവുമായിരുന്നു. 2020 ഏപ്രിൽ-ജൂൺ പാദത്തിൽ രേഖപ്പെടുത്തിയ 80 ശതമാനമാണ് ചൈനീസ് ബ്രാൻഡുകൾക്ക് ഇന്ത്യയിൽ ലഭിച്ച ഏറ്റവും ഉയർന്ന വിപണി വിഹിതം. കൗണ്ടർപോയിന്റ് റിസർച്ചിന്റെ (Counterpoint Research) റിപ്പോർട്ട് അനുസരിച്ച് നിലവിൽ ഇവയുടെ വിഹിതം 67 ശതമാനമാണ്. 2019-ലെ ആദ്യ പാദത്തിന് ശേഷമുള്ള ഏറ്റവും കുറഞ്ഞ നിരക്കാണിത്.
മെമ്മറി ചിപ്പുകളുടെ വില ഉയർന്നതോടെ വിവോ, ഒപ്പോ, ഷാവോമി തുടങ്ങിയ പ്രമുഖ ചൈനീസ് കമ്പനികൾ തങ്ങളുടെ ബജറ്റ് മോഡലുകൾ വിപണിയിൽ എത്തിക്കുന്നത് കുറച്ചു. ദീപാവലി ഉത്സവ സീസണിൽ കുറഞ്ഞ വിലയിലുള്ള ഫോണുകൾ തിരയുന്ന ഉപഭോക്താക്കളുടെ ആവശ്യങ്ങൾ നിറവേറ്റാൻ ലാവ, Ai+ തുടങ്ങിയ തദ്ദേശീയ ഇന്ത്യൻ കമ്പനികൾക്ക് ഇത് വലിയ അവസരമാണ് തുറന്നുനൽകിയിരിക്കുന്നത്.
ചിപ്പ് വിലയിലെ വർധനവ് സ്മാർട്ട്ഫോൺ വിപണിയുടെ ഘടന തന്നെ മാറ്റിമറിക്കുകയാണെന്ന് വിദഗ്ധർ ചൂണ്ടിക്കാട്ടുന്നു. കുറഞ്ഞ ലാഭവിഹിതത്തിൽ പ്രവർത്തിക്കുന്ന ചൈനീസ് കമ്പനികളെയാണ് ഇത് കൂടുതൽ ബാധിച്ചത്. അതേസമയം, പ്രീമിയം ഫോൺ വിഭാഗത്തിലെ കരുത്ത് ഉപയോഗിച്ച് സാംസങ്, ആപ്പിൾ തുടങ്ങിയ ആഗോള ഭീമന്മാർ തങ്ങളുടെ വിപണി വിഹിതം വർധിപ്പിച്ചു.
കുറഞ്ഞ വിലയിലുള്ള ഫോണുകൾക്ക് വിപണിയിൽ ആവശ്യക്കാരുണ്ടെങ്കിലും ഫോൺ വില കൂടുമ്പോൾ അതിനനുസരിച്ച് തങ്ങളുടെ ബജറ്റ് ഉയർത്താൻ ഉപഭോക്താക്കൾ തയാറാകുന്നില്ല. ഈ സാഹചര്യം പരമാവധി പ്രയോജനപ്പെടുത്തുന്ന ഇന്ത്യൻ ബ്രാൻഡുകൾ വിൽപ്പന കൂട്ടുന്നതിൽ ശ്രദ്ധ കേന്ദ്രീകരിച്ച് വിപണിയിൽ ശക്തമാകുന്നു. സെപ്റ്റംബർ 30-ന് അവസാനിച്ച പാദത്തിൽ ഇന്ത്യൻ ബ്രാൻഡുകളുടെ സംയുക്ത വിഹിതം 2 ശതമാനത്തിൽ നിന്ന് 7 ശതമാനമായി ഉയർന്നു. 2018 ഒക്ടോബർ - ഡിസംബർ പാദത്തിന് ശേഷമുള്ള ഏറ്റവും ഉയർന്ന നിരക്കാണിത്.
Ai+, ലാവ എന്നിവയ്ക്കൊപ്പം മിവി, ബോൾട്ട് തുടങ്ങിയ പുതിയ കമ്പനികളാണ് ഇന്ത്യൻ ബ്രാൻഡുകളുടെ ഈ നേട്ടത്തിൽ 95 ശതമാനവും സംഭാവന ചെയ്തത്. കഴിഞ്ഞ വർഷം ജൂലൈയിൽ പ്രവർത്തനം ആരംഭിച്ച Ai+ ബ്രാൻഡ്, ഈ ജൂലൈ-സെപ്റ്റംബർ പാദത്തിൽ മുൻവർഷത്തേക്കാൾ നാല് മടങ്ങിലധികം ഫോണുകളാണ് വിറ്റഴിച്ചത്. അതേസമയം, ഇന്ത്യയിലെ മൊത്തത്തിലുള്ള സ്മാർട്ട്ഫോൺ വിതരണം ഈ പാദത്തിൽ 20 മുതൽ 26 ശതമാനം വരെ കുറഞ്ഞ് 3.58 കോടി ഫോണുകളിലേക്ക് ഒതുങ്ങി. കഴിഞ്ഞ 10 വർഷത്തിനിടയിലെ ഏറ്റവും കുറഞ്ഞ വിൽപ്പന നിരക്കാണിത്.
േിേ്ി
