പരിസ്ഥിതി സംരക്ഷണ സന്ദേശവുമായി ദി ന്യൂ ഇന്ത്യൻ സ്‌കൂളിൽ 'ട്രീ വീക്ക്' ആഘോഷിച്ചു

പ്രദീപ് പുറവങ്കര

മനാമ: പരിസ്ഥിതി സംരക്ഷണവും ഹരിത ബോധവൽക്കരണവും ലക്ഷ്യമിട്ട് ബഹ്‌റൈൻ ദി ന്യൂ ഇന്ത്യൻ സ്‌കൂളിൽ 'ട്രീ വീക്ക്' (Tree Week) ആഘോഷിച്ചു. ഒക്‌ടോബർ 18 മുതൽ 22 വരെ സംഘടിപ്പിച്ച വാരഘോഷത്തിൽ എൽ.കെ.ജി മുതൽ പന്ത്രണ്ടാം ക്ലാസ് വരെയുള്ള വിദ്യാർത്ഥികൾ ആവേശത്തോടെ പങ്കെടുത്തു. മരങ്ങളുടെ പ്രാധാന്യം, വനനശീകരണത്തിന്റെ പ്രത്യാഘാതങ്ങൾ, പരിസ്ഥിതി സംരക്ഷണത്തിനായുള്ള പ്രായോഗിക നടപടികൾ എന്നിവയെക്കുറിച്ച് വിദ്യാർത്ഥികളിൽ അവബോധം വളർത്താനാണ് ഈ പരിപാടി സംഘടിപ്പിച്ചത്. 2030-ഓടെ 3.6 ദശലക്ഷം മരങ്ങൾ നട്ടുപിടിപ്പിക്കുകയെന്ന ബഹ്‌റൈൻ സർക്കാരിന്റെ ലക്ഷ്യത്തിനും ഗ്രീൻ എജ്യുക്കേഷൻ പ്രോഗ്രാമിനും പിന്തുണ പ്രഖ്യാപിച്ചാണ് സ്‌കൂൾ ഈ സംരംഭത്തിന് രൂപം നൽകിയത്.

വിവിധ ക്ലാസുകളിലെ കുട്ടികൾക്കായി വൈവിധ്യമാർന്ന പരിപാടികളാണ് ആസൂത്രണം ചെയ്തിരുന്നത്. എൽ.കെ.ജി മുതൽ മൂന്നാം ക്ലാസ് വരെയുള്ള കുട്ടികൾക്കായി 'ദി ലോറാക്സ്' (The Lorax) കഥയെ ആസ്പദമാക്കി കഥപറച്ചിൽ സെഷൻ സംഘടിപ്പിച്ചു. നാല് മുതൽ ഏഴ് വരെയുള്ള ക്ലാസുകളിലെ വിദ്യാർത്ഥികൾ പോസ്റ്റർ നിർമ്മാണ മത്സരത്തിലൂടെ ഹരിത ഇടങ്ങൾ വ്യാപിപ്പിക്കേണ്ടതിന്റെ ആവശ്യകത ചിത്രീകരിച്ചു. എട്ടാം ക്ലാസ് മുതൽ പന്ത്രണ്ടാം ക്ലാസ് വരെയുള്ള മുതിർന്ന വിദ്യാർത്ഥികൾ വനനശീകരണം, കാലാവസ്ഥാ വ്യതിയാനം, മലിനീകരണം, ജൈവവൈവിധ്യ നാശം തുടങ്ങിയ വിഷയങ്ങളിൽ പവർപോയിന്റ് പ്രസന്റേഷൻ അവതരിപ്പിച്ചു.

പരിസ്ഥിതി സംരക്ഷണം കൂട്ടായ ഉത്തരവാദിത്തമാണെന്ന് ഓർമ്മിപ്പിച്ചുകൊണ്ട് പ്രത്യേക സ്‌കൂൾ അസംബ്ലിയും നടന്നു. സ്റ്റുഡന്റ് കൗൺസിൽ തയ്യാറാക്കിയ ബോധവൽക്കരണ വീഡിയോ പ്രദർശനവും ചടങ്ങിന് മാറ്റുകൂട്ടി. തങ്ങളുടെ വീടുകളിൽ കുറഞ്ഞത് ഒരു ചെടിയെങ്കിലും വളർത്തുമെന്നും വെള്ളവും ഊർജ്ജവും സംരക്ഷിക്കുമെന്നും ഉറപ്പുനൽകുന്ന 'വൺ പ്ലാന്റ്, വൺ പ്രോമിസ്' എന്ന പരിസ്ഥിതി പ്രതിജ്ഞ വിദ്യാർത്ഥികൾ ഏറ്റെടുത്തു. ആഘോഷങ്ങളുടെ ഭാഗമായി നടന്ന ചെടികളുടെ ദാന കാമ്പയിനിൽ രക്ഷിതാക്കളും വലിയ പങ്കാളിത്തം വഹിച്ചു.

#4PMNews #Bahrain #NewIndianSchool #TreeWeek