കെ.പി.എസ്.സി പിരിച്ചുവിടാൻ നിയമോപദേശം തേടുന്നു: കർണാടക മുഖ്യമന്ത്രി ഡി.കെ. ശിവകുമാർ
ശാരിക
ബെംഗളൂരു: റിക്രൂട്ട്മെന്റ് തട്ടിപ്പുകളും അഴിമതിയും തുടർക്കഥയായ സാഹചര്യത്തിൽ കർണാടക പബ്ലിക് സർവീസ് കമ്മീഷൻ (കെ.പി.എസ്.സി) പൂർണമായും പിരിച്ചുവിടുന്നതിനെക്കുറിച്ച് സർക്കാർ നിയമോപദേശം തേടുകയാണെന്ന് മുഖ്യമന്ത്രി ഡി.കെ. ശിവകുമാർ വ്യക്തമാക്കി. അതേസമയം, വിഷയം അന്വേഷിക്കാൻ സർക്കാരിന്റെ അനുമതിയില്ലാതെ പ്രത്യേക അന്വേഷണ സംഘത്തെ (എസ്.ഐ.ടി) നിയോഗിച്ച കർണാടക ഹൈക്കോടതി നടപടിയെ അദ്ദേഹം രൂക്ഷമായി വിമർശിച്ചു.
കർണാടക സ്റ്റേറ്റ് ഇലക്ട്രോണിക്സ് ഡെവലപ്മെന്റ് കോർപ്പറേഷൻ ലിമിറ്റഡിന്റെ (KEONICS) സുവർണ ജൂബിലി ആഘോഷങ്ങളിൽ സംസാരിക്കവെയാണ് മുഖ്യമന്ത്രി നിലപാട് വ്യക്തമാക്കിയത്. ഉദ്യോഗാർത്ഥികളുടെയും വിദ്യാർത്ഥികളുടെയും ഭാവി സംരക്ഷിക്കാനാണ് കമ്മീഷൻ പിരിച്ചുവിടാൻ ആലോചിക്കുന്നത്. തട്ടിപ്പുമായി ബന്ധപ്പെട്ട് നിർണായക തെളിവുകൾ സംസ്ഥാന പോലീസിന്റെ പക്കലുണ്ടെന്നും എല്ലാ വിവരങ്ങളും ഉടൻ പുറത്തുവിടുമെന്നും അദ്ദേഹം പറഞ്ഞു.
വെറ്ററിനറി ഓഫീസർമാരുടെ റിക്രൂട്ട്മെന്റ് ചോദ്യപേപ്പർ ചോർച്ചയുമായി ബന്ധപ്പെട്ട് മുൻ പരീക്ഷാ കൺട്രോളറും ഐ.എ.എസ് ഉദ്യോഗസ്ഥനുമായ ജ്ഞാനേന്ദ്ര കുമാർ ഗാംഗ്വാറിനെ സി.ഐ.ഡി അറസ്റ്റ് ചെയ്തിരുന്നു. ഇതിന് പിന്നാലെയാണ് ഡി.ജി.പി അലോക് കുമാറിന്റെ നേതൃത്വത്തിൽ അഞ്ചംഗ എസ്.ഐ.ടിയെ നിയോഗിച്ച് ഹൈക്കോടതി ഉത്തരവിറക്കിയത്.
തട്ടിപ്പുകൾ അന്വേഷിക്കാൻ സംസ്ഥാന പോലീസിന് പൂർണ പ്രാപ്തിയുണ്ടെന്ന് മുഖ്യമന്ത്രി കൂട്ടിച്ചേർത്തു. അന്വേഷണ ഉദ്യോഗസ്ഥരെ തീരുമാനിക്കാനുള്ള അധികാരം സർക്കാരിനാണെന്നും, അന്വേഷണത്തിൽ വീഴ്ചയുണ്ടെങ്കിൽ മാത്രം ഇടപെടേണ്ട കോടതി നേരിട്ട് എസ്.ഐ.ടിയെ പ്രഖ്യാപിച്ചത് ശരിയായ നടപടിയല്ലെന്നും ഡി.കെ. ശിവകുമാർ വ്യക്തമാക്കി.
േിേ്ി
