ഐക്യരാഷ്ട്രസഭയിൽ വിമർശനവുമായി ഇന്ത്യ: തീരുമാനങ്ങൾ എടുക്കുന്ന വേദികളിൽ 'ഗ്ലോബൽ സൗത്ത്' ഇന്നും പുറത്താണെന്ന് എസ്. ജയശങ്കർ
ശാരിക
ന്യൂയോർക്ക്: ലോകം നേരിടുന്ന വൻ പ്രതിസന്ധികളുടെ ഏറ്റവും വലിയ ഇരകളായി വികസ്വര രാജ്യങ്ങൾ മാറുമ്പോഴും, ലോകത്തിന്റെ ഭാവി നിർണയിക്കുന്ന സുപ്രധാന തീരുമാനങ്ങളെടുക്കുന്നതിൽ അവർ പാർശ്വവൽക്കരിക്കപ്പെടുകയാണെന്ന് ഇന്ത്യൻ വിദേശകാര്യ മന്ത്രി എസ്. ജയശങ്കർ വ്യക്തമാക്കി. 81-ാമത് ഐക്യരാഷ്ട്രസഭാ ജനറൽ അസംബ്ലി സമ്മേളനത്തോടനുബന്ധിച്ച് ന്യൂയോർക്കിൽ നടന്ന 'ഗ്ലോബൽ സൗത്ത്' രാജ്യങ്ങളുടെയും സുഹൃദ് രാഷ്ട്രങ്ങളുടെയും ഉന്നതതല യോഗത്തിൽ സംസാരിക്കുകയായിരുന്നു അദ്ദേഹം.
ആഗോള പ്രതിസന്ധികൾ അനുഭവിക്കുന്നതിൽ ഗ്ലോബൽ സൗത്ത് മുൻനിരയിലാണെങ്കിലും, തീരുമാനങ്ങളെടുക്കുന്ന വേദികളിൽ അവർ ഏറ്റവും പിൻനിരയിലാണെന്ന് അദ്ദേഹം ചൂണ്ടിക്കാട്ടി. പഴയൊരു കാലഘട്ടത്തിൽ രൂപീകരിക്കപ്പെട്ട അന്താരാഷ്ട്ര സ്ഥാപനങ്ങൾ ഇന്നും അന്നത്തെ അധികാര സമവാക്യങ്ങളെയാണ് പ്രതിഫലിപ്പിക്കുന്നത്. പ്രശ്നങ്ങൾ പരിഹരിക്കുമെന്ന് പ്രതീക്ഷിച്ച സംഘടനകൾ ഇന്ന് സ്വയം വലിയൊരു പ്രശ്നമായി മാറിയിരിക്കുകയാണെന്നും, യു.എന്നിലും മറ്റ് ബഹുരാഷ്ട്ര ഏജൻസികളിലും ഘടനാപരമായ പരിഷ്കാരം അനിവാര്യമാണെന്നും അദ്ദേഹം കൂട്ടിച്ചേർത്തു.
ഊർജ്ജം, ഭക്ഷ്യസുരക്ഷ, വ്യാപാരം, കാലാവസ്ഥാ വ്യതിയാന പ്രതിരോധം, നിർമിത ബുദ്ധി (എ.ഐ) തുടങ്ങിയ മേഖലകളിൽ വികസ്വര രാജ്യങ്ങൾ തമ്മിലുള്ള സഹകരണം വർധിക്കണം. ഊർജ്ജ ലഭ്യതയും വിലയും രാഷ്ട്രീയ നേട്ടങ്ങൾക്കായി കൃത്രിമമായി ഉപയോഗിക്കുന്നത് അംഗീകരിക്കാനാവില്ലെന്നും പശ്ചിമേഷ്യൻ സംഘർഷങ്ങളുടെ പശ്ചാത്തലത്തിൽ സമുദ്രപാതകളുടെയും നാവികരുടെയും സുരക്ഷ ഉറപ്പാക്കണമെന്നും അദ്ദേഹം ആവശ്യപ്പെട്ടു.
യു.എൻ സമ്മേളനത്തിനിടെ വിവിധ രാഷ്ട്രത്തലവൻമാരുമായി എസ്. ജയശങ്കർ ഉഭയകക്ഷി ചർച്ചകൾ നടത്തി. ഇറ്റാലിയൻ ഉപപ്രധാനമന്ത്രി അന്റോണിയോ താജാനിയുമായി ഗൾഫ് മേഖലയിലെ സ്ഥിതിഗതികളും ഇന്ത്യ–മിഡിൽ ഈസ്റ്റ്–യൂറോപ്പ് സാമ്പത്തിക ഇടനാഴിയും ചർച്ച ചെയ്തു. കൂടാതെ ഉഗാണ്ടൻ വിദേശകാര്യ മന്ത്രി അഡോണിയ അയേബാരെ, ട്രിനിഡാഡ് ആൻഡ് ടൊബാഗോ പ്രധാനമന്ത്രി കമല പെർസാദ്-ബിസേസർ എന്നിവരുമായും അദ്ദേഹം വികസന പങ്കാളിത്ത ചർച്ചകൾ നടത്തി.
sfsf
