പാർട്ടി അധ്യക്ഷൻ നിതിൻ നബീന്റെ പുതിയ സംഘം വരുന്നു; താക്കൂറും സ്മൃതി ഇറാനിയും മുന്നണിയിലേക്ക്
ഷീബ വിജയൻ
ന്യൂഡൽഹി: ബി.ജെ.പിയുടെ പുതിയ ദേശീയ ഭാരവാഹി പട്ടിക ഇന്ന് പ്രഖ്യാപിക്കും. പാർട്ടി അധ്യക്ഷൻ നിതിൻ നബീന്റെ നേതൃത്വത്തിൽ രൂപീകരിക്കുന്ന പുതിയ ടീമിൽ യുവാക്കൾക്കും അനുഭവസമ്പത്തുള്ള മുതിർന്ന നേതാക്കൾക്കും ഒരുപോലെ പ്രാധാന്യം നൽകാനാണ് കേന്ദ്ര നേതൃത്വത്തിന്റെ തീരുമാനം. വരാനിരിക്കുന്ന വിവിധ സംസ്ഥാന നിയമസഭാ തിരഞ്ഞെടുപ്പുകളും സംഘടനാ സംവിധാനം ശക്തിപ്പെടുത്തലും ലക്ഷ്യമിട്ടാണ് ഈ പുതിയ ടീം രൂപീകരിക്കുന്നത്. മുൻ കേന്ദ്രമന്ത്രിമാരായ അനുരാഗ് താക്കൂറും സ്മൃതി ഇറാനിയും പാർട്ടി സംഘടനാ രംഗത്തേക്ക് സജീവമായി തിരിച്ചെത്തുമെന്നാണ് പുറത്തുവരുന്ന റിപ്പോർട്ടുകൾ. മുൻപ് കേന്ദ്ര മന്ത്രിസഭയിൽ നിന്ന് ഒഴിവാക്കപ്പെട്ട ഇരുവരും ഇനി ദേശീയ തലത്തിൽ സുപ്രധാനമായ സംഘടനാ ചുമതലകൾ വഹിച്ചേക്കും.
ദേശീയ തലത്തിൽ അറിയപ്പെടുന്ന പ്രമുഖ മുഖങ്ങളായ താക്കൂറിന്റെയും ഇറാനിയുടെയും തിരിച്ചുവരവ് പാർട്ടിക്ക് കൂടുതൽ കരുത്തേകുമെന്നാണ് വിലയിരുത്തൽ. ഹിമാചൽ പ്രദേശിൽ നിന്നുള്ള ലോക്സഭാ എം.പിയായ അനുരാഗ് താക്കൂർ മുൻപ് വാർത്താവിതരണ പ്രക്ഷേപണ മന്ത്രിയായും കായിക മന്ത്രിയായും സേവനമനുഷ്ഠിച്ചിട്ടുണ്ട്. ബി.ജെ.പിയുടെ പ്രമുഖ വനിതാ നേതാവായ സ്മൃതി ഇറാനി അമേഠിയിൽ നിന്നുള്ള മുൻ ലോക്സഭാ എം.പിയും മുൻ കേന്ദ്രമന്ത്രിയുമാണ്. ബി.ജെ.പി മഹിളാ മോർച്ചയുടെ അധ്യക്ഷയായും ദേശീയ സെക്രട്ടറിയായും പ്രവർത്തിച്ചിട്ടുള്ള അവർക്ക് പാർട്ടിയുടെ സംഘടനാ സംവിധാനങ്ങളിൽ വലിയ പരിചയസമ്പത്തുണ്ട്. 45കാരനായ നിതിൻ നബീൻ ബി.ജെ.പിയുടെ ഏറ്റവും പ്രായം കുറഞ്ഞ ദേശീയ അധ്യക്ഷനാണ്. അധ്യക്ഷനായ ശേഷമുള്ള അദ്ദേഹത്തിന്റെ ആദ്യ പ്രധാന സംഘടനാ പുനഃസംഘടനയാണിത്.
യുവാക്കൾക്കും വനിതകൾക്കും കൂടുതൽ പ്രാതിനിധ്യം നൽകുന്നതിനൊപ്പം വിവിധ സംസ്ഥാനങ്ങളുടെയും മേഖലകളുടെയും പ്രാതിനിധ്യത്തിൽ സന്തുലിതാവസ്ഥ ഉറപ്പാക്കാനും നേതൃത്വം ലക്ഷ്യമിടുന്നുണ്ട്.
dfsdfsdfsds
