അസമിൽ മുസ്ലിം വിവാഹങ്ങൾക്ക് ഇനി സർക്കാർ രജിസ്ട്രേഷൻ നിർബന്ധം: പുതിയ ചട്ടങ്ങൾക്ക് മന്ത്രിസഭ അംഗീകാരം നൽകി

ശാരിക

ഗുവാഹത്തി: അസമിൽ മുസ്ലിം വിവാഹങ്ങളുടെയും വിവാഹമോചനങ്ങളുടെയും രജിസ്ട്രേഷൻ നിർബന്ധമാക്കുന്നതിനുള്ള പുതിയ ചട്ടങ്ങൾക്ക് സംസ്ഥാന മന്ത്രിസഭ അംഗീകാരം നൽകി. ‘Assam Muslim Marriage Registration (Compulsory) Rules, 2026’ ആണ് മന്ത്രിസഭാ യോഗം അംഗീകരിച്ചത്. ഇതോടെ സംസ്ഥാനത്ത് മുസ്ലിം വിവാഹങ്ങളുടെ രജിസ്ട്രേഷൻ സർക്കാർ സംവിധാനത്തിലൂടെ നിർബന്ധമായും നടത്തേണ്ട സാഹചര്യമാകും നിലവിൽ വരുന്നത്. മന്ത്രിസഭാ യോഗത്തിന് ശേഷം മുഖ്യമന്ത്രി ഹിമന്ത ബിശ്വ ശർമയാണ് ഇക്കാര്യം മാധ്യമങ്ങളെ അറിയിച്ചത്.

ഇനിമുതൽ മുസ്ലിം വിവാഹങ്ങൾ സർക്കാർ നിയമിക്കുന്ന മാര്യേജ് രജിസ്ട്രാർമാർ (Marriage Registrars) മുഖേന മാത്രമായിരിക്കും രജിസ്റ്റർ ചെയ്യുകയെന്ന് അദ്ദേഹം വ്യക്തമാക്കി. അപേക്ഷകൾ വർധിക്കുന്ന സാഹചര്യമുണ്ടായാൽ പഞ്ചായത്തുതല ഉദ്യോഗസ്ഥർക്കും രജിസ്ട്രാറുടെ അധികാരം നൽകുന്ന രീതിയിലുള്ള സംവിധാനങ്ങൾ ഒരുക്കുമെന്നും അദ്ദേഹം കൂട്ടിച്ചേർത്തു. മുൻപ് മുസ്ലിം വിവാഹങ്ങൾ രജിസ്റ്റർ ചെയ്യുന്നതിൽ ഖാസിമാർക്കായിരുന്നു പ്രധാന പങ്കുണ്ടായിരുന്നത്. എന്നാൽ 2024-ൽ കൊണ്ടുവന്ന നിയമത്തിലൂടെ ഇത് പൂർണമായും സർക്കാർ സംവിധാനത്തിന് കീഴിലേക്ക് മാറ്റാനുള്ള നടപടികൾ ആരംഭിച്ചിരുന്നു. ഖാസിമാർ വിവാഹം രജിസ്റ്റർ ചെയ്യുന്നത് വിലക്കിയിരുന്നെങ്കിലും, പകരം ഔദ്യോഗികമായി ആരാണ് രജിസ്ട്രേഷൻ നടത്തേണ്ടതെന്ന കാര്യത്തിൽ കൃത്യമായ വ്യക്തതയുണ്ടായിരുന്നില്ല. പുതിയ ചട്ടങ്ങൾ പ്രാബല്യത്തിൽ വരുന്നതോടെ ഇതിനുള്ള ഔദ്യോഗിക നടപടിക്രമങ്ങൾക്ക് പൂർണതയാവുകയാണ്.

1935-ലെ Assam Muslim Marriages and Divorces Registration Act റദ്ദാക്കിക്കൊണ്ട് കൊണ്ടുവന്ന Assam Compulsory Registration of Muslim Marriages and Divorces Act, 2024 പ്രകാരമാണ് ഈ പുതിയ ചട്ടങ്ങൾ തയ്യാറാക്കിയിരിക്കുന്നത്. ഈ നിയമപ്രകാരം വിവാഹ രജിസ്ട്രേഷനായി വരന് കുറഞ്ഞത് 21 വയസും വധുവിന് 18 വയസും പൂർത്തിയായിരിക്കണം. ഇരുവരുടെയും സ്വതന്ത്രമായ സമ്മതം ഉൾപ്പെടെയുള്ള കർശന നിബന്ധനകളും നിയമത്തിൽ ഉൾപ്പെടുത്തിയിട്ടുണ്ട്. പ്രായപൂർത്തിയാകാത്തവരുടെ വിവാഹം രജിസ്റ്റർ ചെയ്യപ്പെടാനുള്ള സാധ്യത പൂർണമായി ഒഴിവാക്കാൻ ഇതിലൂടെ സാധിക്കും. വിവാഹ രജിസ്ട്രേഷനുമായി ബന്ധപ്പെട്ട ഔദ്യോഗിക നോട്ടീസ് പ്രസിദ്ധീകരിച്ച് 30 ദിവസത്തിനുള്ളിൽ ആർക്കെങ്കിലും എതിർപ്പുണ്ടെങ്കിൽ അത് ഉന്നയിക്കാനുള്ള അവസരവും പുതിയ നിയമം നൽകുന്നുണ്ട്. എതിർപ്പ് ലഭിച്ചാൽ രജിസ്ട്രാർ വിഷയം കൃത്യമായി പരിശോധിച്ച ശേഷമേ തുടർനടപടികളിലേക്ക് കടക്കൂ. വിവാഹങ്ങൾക്ക് പുറമെ മുസ്ലിം വിവാഹമോചനങ്ങളുടെ രജിസ്ട്രേഷനും 2024-ലെ നിയമത്തിന്റെ പരിധിയിൽ നിർബന്ധമാക്കിയിട്ടുണ്ട്. പുതിയ ചട്ടങ്ങൾക്ക് അംഗീകാരം ലഭിച്ചതോടെ വിവാഹ-വിവാഹമോചന രജിസ്ട്രേഷൻ നടപടികൾക്ക് സംസ്ഥാനതലത്തിൽ ഏകീകൃത സ്വഭാവമുള്ള ഒരു സർക്കാർ സംവിധാനം നിലവിൽ വരികയാണ്.

#AssamNews #AssamCabinet #MarriageRegistration #HimantaBiswaSarma #KeralaNews