കൃഷ്ണാനദിയിലെ ജലം അടിയന്തരമായി വിട്ടുനൽകണം: കർണാടകയോട് ആവശ്യപ്പെട്ട് തെലങ്കാന
ശാരിക
ബെംഗളൂരു: തെലങ്കാനയിലെ അതിർത്തി ജില്ലകളിലെ കടുത്ത വരൾച്ചയും കൃഷിനാശവും ഒഴിവാക്കുന്നതിനായി കൃഷ്ണാനദിയിൽ നിന്ന് അടിയന്തരമായി ജലം വിട്ടുനൽകണമെന്ന് കർണാടക സർക്കാരിനോട് ആവശ്യപ്പെട്ട് തെലങ്കാന. ടൂറിസം മന്ത്രി ജുപ്പള്ളി കൃഷ്ണ റാവുവിന്റെയും ഭരണകക്ഷിയായ കോൺഗ്രസ് എം.എൽ.എമാരുടെയും നേതൃത്വത്തിലുള്ള ഉന്നതതല പ്രതിനിധി സംഘം ബെംഗളൂരുവിൽ കർണാടക മുഖ്യമന്ത്രി ഡി.കെ. ശിവകുമാറുമായി കൂടിക്കാഴ്ച നടത്തിയാണ് ഈ ആവശ്യം ഉന്നയിച്ചത്.
വിളവെടുപ്പിന്റെ നിർണായക ഘട്ടത്തിൽ ആവശ്യത്തിന് ജലം ലഭിച്ചില്ലെങ്കിൽ ലക്ഷക്കണക്കിന് ഏക്കറിലെ കൃഷി നശിച്ചുപോകുമെന്ന് പ്രതിനിധി സംഘം ചൂണ്ടിക്കാട്ടി. തെലങ്കാനയിലെ ജൂരാല, നെറ്റെംപാടു, ഭീമ, കോയൽസാഗർ എന്നീ നാല് പ്രധാന ജലസേചന പദ്ധതികൾക്ക് കീഴിലുള്ള 5.5 ലക്ഷം ഏക്കർ കൃഷിയിടങ്ങളെ സംരക്ഷിക്കാൻ വരാനിരിക്കുന്ന ഒരു മാസത്തേക്ക് പ്രതിദിനം 5,000 ക്യൂസെക്സ് ജലം വീതം തുറന്നുവിടണമെന്നാണ് തെലങ്കാനയുടെ ആവശ്യം.
തെലങ്കാനയുടെ ആവശ്യത്തോട് കർണാടക മുഖ്യമന്ത്രി ഡി.കെ. ശിവകുമാർ അനുകൂലമായി പ്രതികരിക്കുകയും ആവശ്യമായ നടപടികൾ സ്വീകരിക്കാമെന്ന് ഉറപ്പുനൽകുകയും ചെയ്തിട്ടുണ്ട്.
അതിർത്തി ജില്ലയായ ജോഗുലാംബ ഗദ്വാളിൽ ജലം ലഭ്യമാക്കണമെന്ന് ആവശ്യപ്പെട്ട് കർഷകർ വലിയ പ്രതിഷേധങ്ങളുമായി രംഗത്തിറങ്ങിയിട്ടുണ്ട്. വിഷയത്തിൽ ഭരണകക്ഷിയായ കോൺഗ്രസിനെതിരെ പ്രതിപക്ഷ പാർട്ടികളായ ബി.ആർ.എസും ബി.ജെ.പിയും പ്രതിഷേധം ശക്തമാക്കിയിട്ടുണ്ട്.
vxvv
