നീറ്റ് പി.ജി 2026 പരീക്ഷാഫലം പ്രഖ്യാപിച്ചു; ഒക്ടോബർ 1 മുതൽ സ്കോർകാർഡ് ഡൗൺലോഡ് ചെയ്യാം
ശാരിക
ന്യൂഡൽഹി: നീറ്റ് പി.ജി 2026 പരീക്ഷയുടെ ഫലം നാഷനൽ ബോർഡ് ഓഫ് എക്സാമിനേഷൻസ് ഇൻ മെഡിക്കൽ സയൻസസ് (NBEMS) പ്രഖ്യാപിച്ചു. രാജ്യത്തെ വിവിധ മെഡിക്കൽ സ്ഥാപനങ്ങളിലെ എം.ഡി, എം.എസ്, പി.ജി ഡിപ്ലോമ കോഴ്സുകളിലേക്കുള്ള പ്രവേശന പരീക്ഷയുടെ ഫലമാണ് പുറത്തുവന്നത്. ഉദ്യോഗാർത്ഥികൾക്ക് ഔദ്യോഗിക വെബ്സൈറ്റായ natboard.edu.in വഴി ഫലം പരിശോധിക്കാവുന്നതാണ്.
കഴിഞ്ഞ ഓഗസ്റ്റ് 30-ന് നടന്ന പരീക്ഷയിൽ 2,63,544 വിദ്യാർത്ഥികളാണ് പങ്കെടുത്തത്. ജയ്പൂരിലെ രണ്ട് പരീക്ഷാ കേന്ദ്രങ്ങളിലുണ്ടായ സാങ്കേതിക തടസ്സങ്ങളെ തുടർന്ന് 2,416 വിദ്യാർത്ഥികൾക്കായി സെപ്റ്റംബർ 5-ന് പുനഃപരീക്ഷ നടത്തിയിരുന്നു. ഫലത്തോടൊപ്പം നീറ്റ് പി.ജി 2026-ന്റെ വിവിധ വിഭാഗങ്ങൾക്കായുള്ള യോഗ്യതാ കട്ട്ഓഫ് മാർക്കുകളും പ്രസിദ്ധീകരിച്ചിട്ടുണ്ട്. ജനറൽ അഥവാ ഇ.ഡബ്ല്യൂ.എസ് വിഭാഗത്തിന് 50 പെർസന്റൈലും (262 മാർക്ക്), ജനറൽ പി.ഡബ്ല്യൂ.ബി.ഡി വിഭാഗത്തിന് 45 പെർസന്റൈലും (244 മാർക്ക്), എസ്.സി / എസ്.ടി / ഒ.ബി.സി / പി.ഡബ്ല്യൂ.ബി.ഡി വിഭാഗങ്ങൾക്ക് 40 പെർസന്റൈലുമാണ് (226 മാർക്ക്) കട്ട്ഓഫ്.
ഉദ്യോഗാർത്ഥികൾക്കുള്ള വ്യക്തിഗത നീറ്റ് പി.ജി 2026 സ്കോർകാർഡുകൾ ഒക്ടോബർ 1 മുതൽ എൻ.ബി.ഇ.എം.എസ് വെബ്സൈറ്റിൽ ലഭ്യമാകും. മാർക്ക്, പെർസന്റൈൽ, ഓൾ ഇന്ത്യ റാങ്ക്, കാറ്റഗറി, യോഗ്യതാ സ്റ്റാറ്റസ് എന്നിവ സ്കോർകാർഡിലുണ്ടാകും. കൂടാതെ, പരീക്ഷയുടെ ഉത്തരസൂചികയും റെസ്പോൺസ് ഷീറ്റും ഒക്ടോബർ 1-ന് തന്നെ പ്രസിദ്ധീകരിക്കും. ഔദ്യോഗിക വെബ്സൈറ്റ് സന്ദർശിച്ച് നീറ്റ് പി.ജി 2026 ലിങ്ക് വഴി പി.ഡി.എഫ് തുറന്ന് അപേക്ഷാ നമ്പറോ റോൾ നമ്പറോ ഉപയോഗിച്ച് ഉദ്യോഗാർത്ഥികൾക്ക് ഫലം കണ്ടെത്താം.
sdfsdf
