കുവൈത്തിൽ വിദേശികളുടെ ആരോഗ്യ ഇൻഷുറൻസ് ഫീസ് 130 ദിനാറായി വർദ്ധിപ്പിക്കുന്നു
കുവൈത്ത് സിറ്റി: വിദേശികളുടെ ആരോഗ്യ ഇൻഷുറൻസ് ഫീസ് 130 ദിനാർ ആയി കൂട്ടുന്നു. നിലവിൽ പ്രതിവർഷം 50 ദിനാറാണു ഫീസ്. ഇൻഷുറൻസ് പദ്ധതിയുടെ കീഴിൽ വിദേശികൾക്കായി പ്രത്യേക ആശുപത്രികൾ നിലവിൽ വരുന്നതോടെ ഫീസ് വർദ്ധന പ്രാബല്യത്തിലാകുമെന്നു ഹെൽത്ത് ഇൻഷുറൻസ് ആശുപത്രി കന്പനി (ദമാൻ) സി.ഇ.ഒ ഡോ.അഹമ്മദ് അൽ സാലെ അറിയിച്ചു. മറ്റു ജി.സി.സി രാജ്യങ്ങളിലെ സംവിധാനങ്ങളും രാജ്യത്തെ സാഹചര്യവും പഠിച്ച ശേഷമാണു ഫീസ് വർദ്ധിപ്പിക്കാൻ തീരുമാനിച്ചതെന്നും അദ്ദേഹം വ്യക്തമാക്കി.
ആരോഗ്യ ഇൻഷുറൻസ് കന്പനിയുടെ കീഴിൽ അഹമ്മദിയിൽ പണിയുന്ന ആദ്യ ആശുപത്രിയുടെ നിർമ്മാണ പ്രവർത്തനങ്ങൾ ആരോഗ്യമന്ത്രി ഡോ.ജമാൽ അൽ ഹർബി ഉദ്ഘാടനം ചെയ്തു.
പൊതു-സ്വകാര്യ പങ്കാളിത്തത്തോടെയാണ് ആശുപത്രി നിർമ്മാണം. സ്വകാര്യമേഖലയിലുള്ള 20 ലക്ഷത്തോളം വിദേശികൾക്കും ബന്ധുക്കൾക്കും ആരോഗ്യ ഇൻഷുറൻസ് ആശുപത്രി ഗുണം ചെയ്യും. ഫർവാനിയ, ജഹ്റ എന്നിവിടങ്ങളിലും ആശുപത്രികൾ പണിയും. 12 മെഡിക്കൽ സെന്ററുകളും ആരംഭിക്കും. അഹമ്മദി ആശുപത്രി 2020ൽ പൂർത്തിയാക്കാനാണു തീരുമാനം. നാലുനിലകളും നിലവറയുമുള്ള ആശുപത്രി 36,793 ചതുരശ്രമീറ്റർ വിസ്തൃതിയിലാണു പണിയുന്നത്. വിവിധ വിഭാഗങ്ങളിലായി 300 കിടക്കകളോടു കൂടിയതാണ് ആശുപത്രി. ശസ്ത്രക്രിയ, ഐ.സി.യു എന്നിവയും സജ്ജീകരിക്കും.


