ബഹ്റൈൻ വിമാനത്താവളത്തിന് സമീപമുള്ള തടാകം കണ്ടൽക്കാടുകളുടെ ആവാസവ്യവസ്ഥയാക്കാൻ നീക്കം; മുഹറഖ് മുനിസിപ്പൽ കൗൺസിൽ നിർദ്ദേശത്തിന് പിന്തുണ
പ്രദീപ് പുറവങ്കര
മനാമ: ബഹ്റൈൻ അന്താരാഷ്ട്ര വിമാനത്താവളത്തിന് സമീപമുള്ള തടാകത്തിൽ കണ്ടൽച്ചെടികൾ നട്ടുപിടിപ്പിച്ച് പ്രകൃതിദത്ത ആവാസവ്യവസ്ഥയാക്കി മാറ്റാനുള്ള നിർദ്ദേശത്തിന് മുഹറഖ് മുനിസിപ്പൽ കൗൺസിൽ ഏകകണ്ഠമായി അംഗീകാരം നൽകി. പ്രദേശത്ത് പ്രാഥമിക പരിശോധന പൂർത്തിയാക്കിയതായും, കണ്ടൽക്കാടുകളുടെ വളർച്ചയ്ക്ക് തടാകം അനുയോജ്യമാണോ എന്ന് ഉറപ്പാക്കാൻ കൂടുതൽ പാരിസ്ഥിതിക പഠനങ്ങൾ ആവശ്യമാണെന്നും മുനിസിപ്പാലിറ്റി കാര്യ-കാർഷിക മന്ത്രാലയം സ്ഥിരീകരിച്ചു.
ബഹ്റൈന്റെ ഹരിതവൽക്കരണം വ്യാപിപ്പിക്കുന്നതിനൊപ്പം മുഹറഖിൽ പുതിയൊരു പ്രകൃതിദത്ത ആകർഷണ കേന്ദ്രം ഒരുക്കാനും തീരദേശ പരിസ്ഥിതി സംരക്ഷിക്കാനുമാണ് ഈ പദ്ധതിയിലൂടെ ലക്ഷ്യമിടുന്നത്.
മുനിസിപ്പാലിറ്റി കാര്യ-കാർഷിക മന്ത്രി വായേൽ അൽ മുബാറക്കിന് നൽകിയ കുറിപ്പിൽ, പ്രദേശത്തെ പാരിസ്ഥിതിക സാഹചര്യങ്ങളെക്കുറിച്ച് സമഗ്രമായ പഠനം നടത്തേണ്ടതുണ്ടെന്ന് കാർഷിക അണ്ടർ സെക്രട്ടറി അസിം അബ്ദുൾലത്തീഫ് വ്യക്തമാക്കി. പ്രാരംഭ വളർച്ചാ ഘട്ടത്തിൽ കണ്ടൽച്ചെടികൾ അതീവ സംവേദനക്ഷമതയുള്ളവയാണ്. ജലത്തിന്റെ ചലനം, വേലിയേറ്റം, വെള്ളത്തിലെ ഉപ്പിന്റെ അളവ്, മണ്ണിന്റെ ഉറപ്പ് തുടങ്ങിയ ഘടകങ്ങൾ ഇവയുടെ വളർച്ചയെ നേരിട്ട് ബാധിക്കും. അതിനാൽ വിവിധ കാലാവസ്ഥകളിൽ ഈ ഘടകങ്ങൾ നിരീക്ഷിച്ച് പഠനം പൂർത്തിയാക്കിയാൽ മാത്രമേ പദ്ധതിയുടെ വിജയവും സുസ്ഥിരതയും ഉറപ്പാക്കാനാകൂ എന്നും അദ്ദേഹം ചൂണ്ടിക്കാട്ടി.
പഠന റിപ്പോർട്ടിന്റെയും ലഭ്യമായ വിഭവങ്ങളുടെയും അടിസ്ഥാനത്തിൽ പദ്ധതി നടപ്പിലാക്കുന്നതിന്റെ പ്രായോഗികത വിലയിരുത്തും. മന്ത്രാലയത്തിന്റെ വിപുലമായ കണ്ടൽക്കാട് വൽക്കരണ പദ്ധതികളിൽ കൗൺസിലിന്റെ ഈ ശുപാർശയും മുൻഗണനാ ക്രമത്തിൽ പരിഗണിക്കുമെന്ന് അദ്ദേഹം ഉറപ്പുനൽകി.
മന്ത്രാലയത്തിന്റെ മറുപടി വ്യക്തമാണെന്നും നിർദ്ദിഷ്ട തടാകത്തിൽ ഉദ്യോഗസ്ഥർ ഇതിനോടകം പരിശോധന നടത്തിയിട്ടുണ്ടെന്നും മുനിസിപ്പൽ കൗൺസിൽ കാര്യ അസിസ്റ്റന്റ് അണ്ടർ സെക്രട്ടറി സാദിഖ് അൽ സിത്രി യോഗത്തിൽ പറഞ്ഞു. പദ്ധതി നടപ്പിലാക്കുന്നതിനുള്ള വിവിധ സാധ്യതകൾ മന്ത്രാലയം ഗൗരവമായി പരിശോധിക്കുകയാണെന്ന് അദ്ദേഹം വ്യക്തമാക്കി. മന്ത്രാലയത്തിന്റെ ഈ അനുകൂല നിലപാടിനെ കൗൺസിലർമാർ ഏകകണ്ഠമായി സ്വാഗതം ചെയ്തു.
കടൽജീവികൾക്ക് സ്വാഭാവിക ആവാസവ്യവസ്ഥയൊരുക്കുന്നതിലും ജൈവവൈവിധ്യം സംരക്ഷിക്കുന്നതിലും തീരശോഷണം തടയുന്നതിലും അന്തരീക്ഷത്തിലെ കാർബൺ ഡൈ ഓക്സൈഡ് ആഗിരണം ചെയ്യുന്നതിലും കണ്ടൽക്കാടുകൾ നിർണ്ണായക പങ്കാണ് വഹിക്കുന്നത്. എന്നാൽ ഇവ വിജയകരമായി വളരണമെങ്കിൽ വെള്ളത്തിലെ ഉപ്പിന്റെ അളവും വേലിയേറ്റവും മണ്ണിന്റെ ഘടനയും അനുയോജ്യമായിരിക്കേണ്ടതുണ്ട്.


