ജോസ് കെ മാണിക്കെതിരെ തൊടുപുഴ പൊലീസിൽ പരാതി
തൊടുപുഴ: കേരള കോൺഗ്രസ് (എം) നേതാവ് ജോസ് കെ. മാണിക്കെതിരെ തൊടുപുഴ പൊലീസിൽ പരാതി. പാർട്ടി സംസ്ഥാന കമ്മിറ്റിയുടെ മിനിറ്റ്സിൽ വ്യാജ ഒപ്പിട്ടെന്നാണ് പരാതി. യോഗത്തിൽ പങ്കെടുക്കാത്ത വ്യക്തിയുടെ പേരിൽ വ്യാജ ഒപ്പിട്ടെന്നാണ് ആരോപണം.
തൊടുപുഴ സ്വദേശി ഫിലിപ്പ് സ്റ്റീഫനാണ് ജോസ് കെ. മാണിക്കെതിരെ പരാതി നൽകിയത്. കേരള കോൺഗ്രസ് (എം) ചെയർമാനായി ജോസ് കെ. മാണിയെ തെരഞ്ഞെടുത്ത യോഗത്തിൽ താൻ പങ്കെടുത്തിരുന്നില്ല. എന്നാൽ താൻ പങ്കെടുത്തുവെന്ന് കാണിച്ച് കമ്മിറ്റിയുടെ മിനിറ്റ്സിൽ വ്യാജ ഒപ്പിട്ടെന്നാണ് ഫിലിപ്പ് സ്റ്റീഫന്റെ പരാതി. പി.ജെ ജോസഫ് വിഭാഗം നേതാവാണ് ഫിലിപ്പ് സ്റ്റീഫൻ. ജോസ് കെ മാണിയെ ചെയർമാനായി തെരഞ്ഞെടുത്ത നടപടിക്കെതിരെ തൊടുപുഴ കോടതിയിൽ കേസ് കൊടുത്തതും സ്റ്റീഫനായിരുന്നു. സംസ്ഥാന കമ്മിറ്റി അംഗങ്ങളായ ഫിലിപ്പ് സ്റ്റീഫന്റെയും മനോഹർ നടുവിലേടത്തിന്റെയും ഹർജിയെ തുടർന്ന് കേരള കോൺഗ്രസ് (എം) ചെയർമാനായി ജോസ് കെ മാണിയെ തെരഞ്ഞെടുത്ത നടപടി കോടതി േസ്റ്റ ചെയ്തിരുന്നു.
