സുശാന്തിന്റെ അവസാന ചിത്രത്തിന് റിലീസ് ചെയ്ത് 24 മണിക്കൂറിനുള്ളിൽ 95 മില്യൺ വ്യൂസ്
അന്തരിച്ച ബോളിവുഡ് നടൻ സുശാന്ത് സംഗ് രാജ്പുതിന്റെ അവസാന ചിത്രമായ ദിൽ ബെച്ചാര ഡിസ്‌നി ഹോട്ട്സ്റ്റാർ ഒ.ടി.ടി പ്ലാറ്റ്‌ഫോം വഴി റിലീസ് ചെയ്തിരുന്നു. റിലീസ് ചെയ്ത് 24 മണിക്കൂറിനകം 95 മില്യൺ വ്യൂസ് ആണ് ചിത്രം നേടിയത്. ലോകത്തെ ജനപ്രിയ വെബ്‌സീരീസുകളിൽ ഒന്നാം സ്ഥാനത്തുള്ള ഗെയിം ഓഫ് ത്രോൺ‍സ് നേടുന്ന സമാനമായ സ്വീകരണമാണ് ചിത്രത്തിന് ലഭിച്ചതെന്ന് ഓർ‍മാക്‌സ് മീഡിയ എന്ന ടെക് ഫേം പറഞ്ഞു. മിഡ് ഡേയാണ് ഇക്കാര്യം റിപ്പോർ‍ട്ട് ചെയ്തത്.
ജൂണ്‍ 14നാണ് സുശാന്ത് ആത്മഹത്യ ചെയ്യുന്നത്. അതിന് മുന്പ് തന്നെ ചിത്രത്തിന്റെ റിലീസ് ഹോട്ട്സ്റ്റാർ പ്രഖ്യാപിച്ചിരുന്നു. നടന്റെ ആരാധകർ ഇതിനെതിരെ രംഗത്ത് വന്നിരുന്നുവെങ്കിലും ഒ.ടി.ടി പ്ലാറ്റ്‌ഫോം വഴി തന്നെ റിലീസ് ചെയ്യാൻ ഹോട്ട്സ്റ്റാർ തീരുമാനിക്കുകയായിരുന്നു.
തീയേറ്ററിൽ ചിത്രം റിലീസ് ചെയ്തിരുന്നുവെങ്കിൽ എങ്ങനെയായിരിക്കും എന്നും ഓർ‍മാക്‌സ് മീഡിയ റിപ്പോർ‍ട്ടിൽ പറയുന്നു. തീയേറ്റർ ടിക്കറ്റ് നിലവാരം 100 രൂപയായെടുത്ത് പരിശോധിച്ചാൽ ചിത്രം 950 കോടി രൂപ നേടുമായിരുന്നു. 2019ൽ പി.വി.ആർ സിനിമാസിലെ ശരാശരി ടിക്കറ്റ് തുക 207 രൂപയായിരുന്നു. ഈ കണക്കിൽ പരിശോധിക്കുകയാണെങ്കിൽ ചിത്രം 2000 കോടി രൂപ നേടുമായിരുന്നുവെന്നും റിപ്പോർ‍ട്ടിൽ പറയുന്നു.
