ഗസ്സയിലെ എ.ഐ ആക്രമണം തുറന്നുകാട്ടിയ ഡോക്യുമെന്ററി: സംവിധായകരുടെ പൗരത്വം റദ്ദാക്കുമെന്ന് ഇസ്രായേൽ
ഷീബ വിജയൻ
തെൽ അവീവ്: ഫലസ്തീനികൾക്കെതിരെ ഇസ്രായേൽ ആർട്ടിഫിഷ്യൽ ഇന്റലിജൻസ് (AI) സംവിധാനങ്ങൾ ഉപയോഗിക്കുന്നത് തുറന്നുകാട്ടിയ ‘നാസ’ (Nasa) ഡോക്യുമെന്ററിയുടെ സംവിധായകരായ യുവാൽ അബ്രഹാം, റേച്ചൽ സോർ എന്നിവർക്കെതിരെ കടുത്ത നടപടിയുമായി ഇസ്രായേൽ. വെനീസ് ചലച്ചിത്രമേളയിൽ ചിത്രം സ്പെഷ്യൽ ജൂറി പുരസ്കാരം നേടിയതിന് പിന്നാലെയാണ് സംവിധായകരുടെ നടപടി രാജ്യദ്രോഹമാണെന്നും ഇവരുടെ ഇസ്രായേലി പൗരത്വം ഉടൻ റദ്ദാക്കുമെന്നും സാംസ്കാരിക മന്ത്രി മിരി സോഹർ പ്രഖ്യാപിച്ചത്.
ഗസ്സയിലെ ജനങ്ങളെ നിരീക്ഷിക്കാനും ലക്ഷ്യങ്ങൾ നിർണ്ണയിക്കാനും 'ലാവെൻഡർ' എന്ന എ.ഐ സിസ്റ്റം ഉപയോഗിച്ച് സൈന്യം നടത്തുന്ന ആസൂത്രിത ആക്രമണങ്ങളാണ് 80 മിനിറ്റ് ദൈർഘ്യമുള്ള ഡോക്യുമെന്ററി വെളിപ്പെടുത്തുന്നത്. 24 ഇസ്രായേലി സൈനിക-രഹസ്യാന്വേഷണ ഉദ്യോഗസ്ഥരുടെ വെളിപ്പെടുത്തലുകൾ ഉൾപ്പെടുത്തിയ ചിത്രം മൂന്ന് വർഷത്തെ അന്വേഷണത്തിനൊടുവിലാണ് പൂർത്തിയാക്കിയത്. എന്നാൽ ചിത്രത്തിലെ വിവരങ്ങൾ തികച്ചും അടിസ്ഥാനരഹിതമാണെന്ന് ഇസ്രായേൽ പ്രതിരോധ സേന (IDF) പ്രതികരിച്ചു.
വെസ്റ്റ് ബാങ്കിലെ കുടിയേറ്റ അതിക്രമങ്ങളെക്കുറിച്ചുള്ള 'നോ അതർ ലാൻഡ്' എന്ന ചിത്രത്തിലൂടെ ഓസ്കർ പുരസ്കാരം നേടിയവരാണ് ഈ സംവിധായകർ. ഡോക്യുമെന്ററിയുടെ പേരിൽ ഇസ്രായേലിലെ തീവ്രവലതുപക്ഷ ദേശീയ സുരക്ഷാ മന്ത്രി ഇറ്റാമർ ബെൻ-ഗ്വിർ അടക്കമുള്ള നേതാക്കളും ഇവർക്കെതിരെ രംഗത്തെത്തിയിട്ടുണ്ട്. അതേസമയം, അന്താരാഷ്ട്ര തലത്തിൽ വലിയ ചർച്ചയായ ചിത്രം സിനിമാ ലോകത്ത് വൻ ശ്രദ്ധ നേടുകയാണ്.
fsdfsddfs
