അതിഥി വേഷങ്ങളിൽ ഇനി വിജയ് സേതുപതിയില്ല; ഇളവ് 'ജയിലർ 2'-ന് മാത്രം
ഷീബ വിജയൻ
സിനിമകളിൽ അതിഥി വേഷങ്ങൾ ചെയ്യുന്നത് പൂർണമായും അവസാനിപ്പിച്ചതായി തമിഴ് താരം വിജയ് സേതുപതി വ്യക്തമാക്കി. താൻ പ്രധാന വേഷങ്ങൾ ചെയ്യുന്ന സിനിമകളുടെ ബിസിനസിനെ ഇത്തരം കുഞ്ഞു വേഷങ്ങൾ ദോഷകരമായി ബാധിക്കുന്നുണ്ടെന്ന് മനസ്സിലാക്കിയാണ് ഈ തീരുമാനം. എന്നാൽ സൂപ്പർസ്റ്റാർ രജനികാന്ത് നായകനാകുന്ന 'ജയിലർ 2' എന്ന ചിത്രത്തിന് വേണ്ടി മാത്രം താൻ ഈ തീരുമാനത്തിൽ ഇളവ് വരുത്തിയിട്ടുണ്ടെന്ന് താരം തുറന്നുപറഞ്ഞു. രജനികാന്തിനോടുള്ള അടങ്ങാത്ത ആരാധനയും അദ്ദേഹത്തോടൊപ്പം സമയം ചെലവഴിക്കുമ്പോൾ ലഭിക്കുന്ന അനുഭവങ്ങളുമാണ് ചിത്രത്തിൽ അഭിനയിക്കാൻ പ്രേരണയായത്. രജനി സാറിന്റെ സിനിമയിൽ താൻ ഒരു അതിഥി വേഷം ചെയ്താൽ ആളുകൾ ശ്രദ്ധിക്കുക പോലുമില്ലെന്നും എന്നാൽ മറ്റ് സിനിമകളിൽ അങ്ങനെ ചെയ്യുമ്പോൾ അത് സ്വന്തം ചിത്രങ്ങളുടെ വ്യാവസായിക വിജയത്തെ ബാധിക്കുമെന്നും അദ്ദേഹം വിശദീകരിച്ചു. അതിഥി വേഷങ്ങൾക്ക് പുറമെ സാധാരണ വില്ലൻ വേഷങ്ങൾ തെരഞ്ഞെടുക്കുന്നതിലും താൻ കടുത്ത നിയന്ത്രണങ്ങൾ കൊണ്ടുവന്നിട്ടുണ്ടെന്നും തിരക്കഥക്ക് അത്രയേറെ അനിവാര്യമായ വേഷങ്ങൾ മാത്രമേ ഇനി സ്വീകരിക്കൂ എന്നും അദ്ദേഹം കൂട്ടിച്ചേർത്തു. നെൽസൺ ദിലീപ്കുമാർ സംവിധാനം ചെയ്യുന്ന 'ജയിലർ 2' 2026 ഒക്ടോബർ 15-നാണ് തിയറ്ററുകളിൽ എത്തുന്നത്.
cxcvxcvxc
