‘കറുപ്പി’ന് 300 കോടി നേട്ടം; അണിയറ പ്രവർത്തകർക്ക് ആഡംബര കാറുകൾ സമ്മാനിച്ച് സൂര്യ
ഷീബ വിജയൻ
ആഗോളതലത്തിൽ 300 കോടി രൂപയിലധികം കലക്ഷൻ നേടി ചരിത്രവിജയം കുറിച്ച ‘കറുപ്പ്’ എന്ന ചിത്രത്തിന്റെ അണിയറ ശിൽപ്പികൾക്ക് അപ്രതീക്ഷിത സമ്മാനവുമായി തമിഴ് സൂപ്പർസ്റ്റാർ സൂര്യ രംഗത്തെത്തി. ചിത്രത്തിന്റെ വൻ വിജയത്തിൽ നിർണ്ണായക പങ്കുവഹിച്ച സാങ്കേതിക പ്രവർത്തകരായ സംഗീത സംവിധായകൻ സായ് അഭയങ്കർ, എഡിറ്റർ കലൈവാനൻ, ഛായാഗ്രഹകൻ ജി.കെ. വിഷ്ണു എന്നിവർക്കാണ് സൂര്യ പുത്തൻ മഹീന്ദ്ര BE 6 ഇലക്ട്രിക് എസ്.യു.വികൾ സമ്മാനമായി നൽകിയത്. ഏകദേശം 30 ലക്ഷം രൂപയോളം വിലമതിക്കുന്നതാണ് ഓരോ കാറുകളും. സിനിമയുടെ ചിത്രീകരണവേളയിലും പോസ്റ്റ് പ്രൊഡക്ഷൻ ഘട്ടത്തിലും ഇവർ നൽകിയ കഠിനാധ്വാനത്തിനുള്ള അംഗീകാരമായാണ് താരം ഈ വിലയേറിയ സമ്മാനങ്ങൾ നൽകിയത്. ആർ.ജെ. ബാലാജി സംവിധാനം ചെയ്തതും തൃഷ കൃഷ്ണൻ നായികയായി എത്തിയതുമായ ഈ ആക്ഷൻ ഫാന്റസി ചിത്രം സൂര്യയുടെ കരിയറിലെ ഏറ്റവും മികച്ച തിരിച്ചുവരവുകളിൽ ഒന്നായി മാറിയിരിക്കുകയാണ്. സാങ്കേതിക പ്രവർത്തകരെ എപ്പോഴും വിലമതിക്കുന്ന സൂര്യയുടെ ഈ മാതൃകാപരമായ പെരുമാറ്റം സമൂഹമാധ്യമങ്ങളിൽ വലിയ ചർച്ചയാവുകയും സമ്മാനം ലഭിച്ചവർ സൂര്യയോട് നന്ദി അറിയിക്കുകയും ചെയ്തു.
ASASASAS
