വെടിവെപ്പ് ഭീതിക്ക് പിന്നാലെ മുംബൈയിലെ ആഡംബര ഫ്ലാറ്റ് വിറ്റ് ടൈഗർ ഷെറോഫ്

ശാരിക

മുംബൈ: ബോളിവുഡ് നടൻ ടൈഗർ ഷ്‌റോഫ് മുംബൈയിലെ ഖാർ വെസ്റ്റിലുള്ള തൻ്റെ ആഡംബര ഫ്ലാറ്റ് ഒൻപത് കോടി രൂപയ്ക്ക് വിറ്റു. ഒക്ടോബർ 22-നാണ് ഇതിൻ്റെ രജിസ്ട്രേഷൻ നടപടികൾ പൂർത്തിയായത്. മുംബൈ ജുഹുവിൽ വച്ച് നടൻ്റെ കാറിന് നേരെ വെടിവെപ്പുണ്ടായ സംഭവത്തിന് തൊട്ടുപിന്നാലെയാണ് ഈ വസ്തു വിൽപന നടന്നിരിക്കുന്നത്.

റിയൽ എസ്റ്റേറ്റ് ഡാറ്റ അനലിറ്റിക്സ് സ്ഥാപനമായ സി.ആർ.ഇ മാട്രിക്സ് (CRE Matrix) പുറത്തുവിട്ട രേഖകൾ പ്രകാരം, 'റസ്റ്റംജി പാരമൗണ്ട് ഡി കോ-ഓപ്പറേറ്റീവ് ഹൗസിങ് സൊസൈറ്റി'യുടെ ഒൻപതാം നിലയിലാണ് ഈ ഫ്ലാറ്റ് സ്ഥിതി ചെയ്യുന്നത്. 1,291.14 ചതുരശ്ര അടി കാർപെറ്റ് ഏരിയയും 95.80 ചതുരശ്ര അടി എക്സ്ക്ലൂസീവ് ഏരിയയുമുള്ള ഫ്ലാറ്റാണിത്. ചതുരശ്ര അടിക്ക് ഏകദേശം 64,891 രൂപ നിരക്കിൽ നടപ്പാക്കിയ ഈ ഇടപാടിൽ 54 ലക്ഷം രൂപ സ്റ്റാമ്പ് ഡ്യൂട്ടിയായി അടച്ചിട്ടുണ്ട്. രണ്ട് കവേർഡ് കാർ പാർക്കിങ് സൗകര്യങ്ങളും ഈ കരാറിൽ ഉൾപ്പെടുന്നു.

2018 ജൂലൈ 17-ന് കെയ്‌സ്റ്റോൺ റിയൽറ്റേഴ്‌സ് പ്രൈവറ്റ് ലിമിറ്റഡിൽനിന്ന് 7.61 കോടി രൂപയ്ക്കാണ് ടൈഗർ ഈ ഫ്ലാറ്റ് വാങ്ങിയത്. ഏകദേശം ഒരു വർഷം മുമ്പ് ഇതേ റെസിഡൻഷ്യൽ പ്രോജക്റ്റിലെ മറ്റൊരു ഫ്ലാറ്റും അദ്ദേഹം വിറ്റിരുന്നു. 15.6 കോടി രൂപയ്ക്കായിരുന്നു അന്നത്തെ വിൽപന. സ്ക്വയർ യാർഡ്‌സ് പരിശോധിച്ച രേഖകൾ പ്രകാരം ആ ഇടപാടിലൂടെ ഏകദേശം 31 ശതമാനം ലാഭമാണ് നടൻ നേടിയത്. 22-ാം നിലയിലുണ്ടായിരുന്ന ആ ഫ്ലാറ്റിന് 1,989.72 ചതുരശ്ര അടി കാർപെറ്റ് ഏരിയയും 2,189 ചതുരശ്ര അടി ബിൽറ്റ്-അപ്പ് ഏരിയയും ഉണ്ടായിരുന്നു. 2018-ൽ 11.62 കോടി രൂപയ്ക്കാണ് അത് വാങ്ങിയിരുന്നത്.

2026-ൽ നേരത്തേ പൂനെയിലെ ഹഡാപ്സറിലുള്ള ഒരു താമസസ്വത്തും ടൈഗർ ഷ്രോഫ് വിറ്റഴിച്ചിരുന്നു. സാപ്കീയുടെ (Zapkey) കണക്കുകൾ പ്രകാരം 8.87 കോടി രൂപയ്ക്കായിരുന്നു വിൽപന നടത്തിയത്. 2024 മാർച്ചിൽ 7.5 കോടി രൂപയ്ക്ക് വാങ്ങിയ ഈ സ്വത്ത് വിറ്റതിലൂടെ 18.3 ശതമാനം നിക്ഷേപ നേട്ടമാണ് ലഭിച്ചത്.

അതേസമയം, ഒക്ടോബർ 18-ന് വൈകിട്ടാണ് മുംബൈയിലെ ജുഹു മേഖലയിൽ ടൈഗർ ഷ്‌റോഫിന്റെ കാറിന് നേരെ ആക്രമണമുണ്ടായത്. ബൈക്കിലെത്തിയ രണ്ടുപേർ വെടിയുതിർത്ത ശേഷം കടന്നുകളയുകയായിരുന്നു. ഈ സംഭവത്തിൽ നടന്റെ ഡ്രൈവർക്കും ഒരു വഴിയാത്രക്കാരനും പരിക്കേറ്റിരുന്നു.