മയക്കുമരുന്ന് വിൽപ്പന നടത്തിയ പഴക്കച്ചവടക്കാരന് തടവ്
മനാമ : മയക്കുമരുന്ന് കേസിൽ കുറ്റക്കാരനെന്ന് കണ്ടെത്തിയതിനെത്തുടർന്ന് ഏഷ്യൻ പഴക്കച്ചവടക്കാരന് ആറു മാസത്തെ തടവുശിക്ഷ. കേസ് ഫയൽ പ്രകാരം രാവിലെ പഴക്കച്ചവടത്തിലേർപ്പെട്ടിരുന്ന ഇയാൾ രാത്രിയിലാണ് മയക്കുമരുന്ന് വിൽപ്പന നടത്തിയിരുന്നത്.
കഴിഞ്ഞ മാർച്ചിൽ മനാമയിലെ ഒരു ഹോട്ടലിന് സമീപം 100 ബഹ്റൈൻ ദിനാർ വിലവരുന്ന മയക്കുമരുന്ന് വിൽക്കാൻ ശ്രമിക്കുന്നതിനിടെയാണ് ഇയാളെ പിടികൂടിയത്. ഒൻപത് വർഷം മുൻപ് ബഹ്റൈനിലെത്തിയ ഇയാൾ നിലവിൽ രാജ്യത്ത് അനധികൃതമായി താമസിച്ചു വരികയായിരുന്നുവെന്ന് പോലീസ് പറഞ്ഞു.
രാജ്യത്ത് അനധികൃതമായി താമസിച്ചതിന് പുറമെ, മയക്കുമരുന്ന് വാങ്ങുകയും വിൽക്കുകയും ചെയ്തെന്ന കുറ്റവും പ്രോസിക്യൂഷൻ പ്രതിക്കുമേൽ ആരോപിച്ചു. ആറ് മാസവും 10 ദിവസവും തടവുശിക്ഷയനുഭവിച്ച ശേഷം പ്രതിയെ നാടുകടത്തും.
