കൺസ്യൂമർ ഗുഡ്സ് മേഖലയിൽ ബഹ്റൈൻ-ഇന്ത്യ സഹകരണം ശക്തിപ്പെടുത്തും
മനാമ : അതിവേഗം വളർന്ന് കൊണ്ടിരിക്കുന്ന കൺസ്യൂമർ ഗുഡ്സ് (എഫ്.എം.സി.ജി) മേഖലയിൽ ബഹ്റൈൻ - ഇന്ത്യ സഹകരണം ശക്തിപ്പെടുത്തുന്നതിനുള്ള സാധ്യതകൾ ഇരു രാജ്യങ്ങളും ചർച്ച ചെയ്യും. ഇതിന്റെ ഭാഗമായി ബഹ്റൈനിൽ നിന്നുള്ള സംരംഭകർ നവംബറിൽ നടക്കുന്ന വേൾഡ് ഫുഡ് ഇന്ത്യൻ എക്സ്പോയിൽ പങ്കെടുക്കും. ബഹ്റൈൻ ചേംബർ ഓഫ് കൊമേഴ്സ് ആന്റ് ഇൻഡസ്ട്രി (ബി.സി.സി.ഐ)യുടെ ഫുഡ് ആന്റ് അഗ്രികൾച്ചർ സെക്ടർ കമ്മിറ്റി, ഇന്ത്യൻ എംബസി, കോൺഫെഡറേഷൻ ഓഫ് ഇൻഡ്യൻ ഇൻഡസ്ട്രി (സി.ഐ.ഐ) എന്നിവർ സംയുക്തമായാണ് എക്സ്പോയിൽ പങ്കെടുക്കുന്നത്.
ഇന്ത്യൻ അംബാസിഡർ അലോക് കുമാർ സിൻഹ, ബി.സി.സി.ഐ ഫുഡ് ആന്റ് അഗ്രികൾച്ചറൽ സെക്ടർ കമ്മിറ്റി, എഫ്.എം.സി.ജി മേഖലയിലെ സംരംഭകർ എന്നിവരുടെ ഒരു ബോധവത്കരണ സെമിനാർ കഴിഞ്ഞ ദിവസം ബഹ്റൈൻ ചേന്പർ ഓഫ് കോമേഴ്സിൽ വെച്ച് നടന്നിരുന്നു. ഇരു രാജ്യങ്ങളും തമ്മിലുള്ള നിക്ഷേപ ബന്ധം മെച്ചപ്പെടുത്തുന്നതിന് ഇന്ത്യക്ക് താൽപര്യമുണ്ടെന്ന് സി.ഐ.ഐ പ്രതിനിധി സി.എസ് രാഘവൻ ഈ സെമിനാറിൽ വ്യക്തമാക്കി. ഇന്ത്യയിൽ നിന്ന് ഇവിടെ വന്ന് ധാരാളം പേർ നിക്ഷേപം നടത്തുന്നുണ്ട്. ഇന്ത്യയിൽ നിക്ഷേപം നടത്താൻ ആഗ്രഹിക്കുന്ന നിരവധി ബഹ്റൈൻ കന്പനികളും ഉണ്ട്. ഇത്തരം ബിസിനസ് പങ്കാളിത്തത്തിന് താൽപര്യമുള്ളവരെ ഇന്ത്യ സ്വാഗതം ചെയ്യുന്നതായും അദ്ദേഹം പറഞ്ഞു.
