ബഹ്‌റൈൻ രാജാവുമായി ഈജിപ്ഷ്യൻ വിദേശകാര്യ മന്ത്രി കൂടിക്കാഴ്ച നടത്തി; പ്രസിഡന്റ് അൽ സിസിയുടെ സന്ദേശം കൈമാറി
പ്രദീപ് പുറവങ്കര
മനാമ: ബഹ്‌റൈൻ രാജാവ് ഹമദ് ബിൻ ഈസ അൽ ഖലീഫയ്ക്ക് ഈജിപ്ഷ്യൻ പ്രസിഡന്റ് അബ്ദുൽ ഫത്താഹ് അൽ സിസിയുടെ ലിഖിത സന്ദേശം ലഭിച്ചു. ഇരുരാജ്യങ്ങളും തമ്മിലുള്ള ഉഭയകക്ഷി ബന്ധത്തെക്കുറിച്ചും പ്രാദേശിക, അന്തർദേശീയ സംഭവവികാസങ്ങളെക്കുറിച്ചുമുള്ള സന്ദേശമാണ് പ്രസിഡന്റ് കൈമാറിയത്.
22-ാമത് ഐ.ഐ.എസ്.എസ് (IISS) മനാമ ഡയലോഗിൽ പങ്കെടുക്കാനായി മനാമയിലെത്തിയ ഈജിപ്ഷ്യൻ വിദേശകാര്യ മന്ത്രി ഡോ. ബദർ അബ്ദലാത്തിയാണ് രാജാവിന് സന്ദേശം നൽകിയത്. കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് അൽ ഖലീഫയുടെ സാന്നിധ്യത്തിലായിരുന്നു കൂടിക്കാഴ്ച.
ബഹ്‌റൈനും അവിടുത്തെ ജനങ്ങൾക്കും നേരെ നടന്ന ഇറാൻ ആക്രമണങ്ങളെ സന്ദേശത്തിൽ പ്രസിഡന്റ് അൽ സിസി ശക്തമായി അപലപിച്ചു. ബഹ്‌റൈനോടുള്ള ഈജിപ്തിന്റെ പൂർണ്ണ ഐക്യദാർഢ്യം അദ്ദേഹം ആവർത്തിച്ച് വ്യക്തമാക്കുകയും ചെയ്തു.
ബഹ്‌റൈനും ഈജിപ്തും തമ്മിലുള്ള ദീർഘകാല ബന്ധവും ഇരുരാജ്യങ്ങളുടെയും പ്രതിബദ്ധതയിലൂടെ അത് കൂടുതൽ ശക്തിപ്പെടുന്നതും ഹമദ് രാജാവ് എടുത്തുപറഞ്ഞു. വ്യാപാര വർദ്ധനവ്, സംയുക്ത നിർമ്മാണം വികസിപ്പിക്കൽ, ഇരുരാജ്യങ്ങളുടെയും ഉൽപ്പന്നങ്ങൾക്കായി പുതിയ വിപണികൾ തുറക്കൽ എന്നിവയിലൂടെ നിലവിലെ പങ്കാളിത്തം കൂടുതൽ മികച്ചതാക്കാൻ കൂടിക്കാഴ്ചയിൽ തീരുമാനമായി. ഇരുരാജ്യങ്ങൾക്കും മുന്നിലുള്ള വാണിജ്യ സാധ്യതകളും വിവിധ സാമ്പത്തിക കൂട്ടായ്മകളുമായുള്ള സ്വതന്ത്ര വ്യാപാര കരാറുകളുടെ പ്രയോജനങ്ങളും ചർച്ചയിൽ വിഷയമായി. ഇരുരാജ്യങ്ങളും തമ്മിലുള്ള ബന്ധം കൂടുതൽ ദൃഢമാക്കാൻ പ്രസിഡന്റ് അൽ സിസി നടത്തുന്ന ശ്രമങ്ങളെയും ബഹ്‌റൈനോട് കാണിക്കുന്ന പിന്തുണയെയും രാജാവ് പ്രശംസിച്ചു. അറബ് ദേശീയ സുരക്ഷ സംരക്ഷിക്കുന്നതിലും മേഖലയിലെ സ്ഥിരത ഉറപ്പുവരുത്തുന്നതിലും ഈജിപ്ത് വഹിക്കുന്ന ചരിത്രപരമായ പങ്കിനെയും അദ്ദേഹം പ്രകീർത്തിച്ചു.
കൂടിക്കാഴ്ചയ്ക്കിടെ ഈജിപ്തിലേക്ക് ഔദ്യോഗിക സന്ദർശനം നടത്തുന്നതിനായി അൽ സിസിയുടെ ക്ഷണം ഡോ. ബദർ അബ്ദലാത്തി ഹമദ് രാജാവിന് കൈമാറി.
asssaas
adssadsadsa
