മെസ്സിയെ മറികടന്ന് റൊണാൾഡോ! പ്രഥമ 'ബാലൺ ഡി ഓർ ഓഫ് ഓൾ ടൈം' പുരസ്കാരം സ്വന്തമാക്കി സിആർ7

ഷീബ വിജയൻ

പാരീസ്: ഫ്രാൻസ് ഫുട്ബോൾ മാസിക ഏർപ്പെടുത്തിയ പ്രഥമ ‘ബാലൺ ഡി ഓർ ഓഫ് ഓൾ ടൈം’ (BOAT) പുരസ്കാരം പോർച്ചുഗൽ സൂപ്പർതാരം ക്രിസ്റ്റ്യാനോ റൊണാൾഡോ സ്വന്തമാക്കി. അർജന്റൈൻ ഇതിഹാസം ലയണൽ മെസ്സിയെ മറികടന്നാണ് ആരാധക വോട്ടെടുപ്പിൽ 41-കാരനായ ക്രിസ്റ്റ്യാനോ ഒന്നാമതെത്തിയത്. ഒന്നിലധികം തവണ ബാലൺ ഡി ഓർ നേടിയ താരങ്ങളുടെ എക്കാലത്തെയും മികച്ച സീസൺ കണ്ടെത്താൻ ലോകമെമ്പാടുമുള്ള ആരാധകർക്ക് അവസരം നൽകുകയായിരുന്നു. തെരഞ്ഞെടുക്കപ്പെടുന്നവർക്ക് 2027-ലെ ബാലൺ ഡി ഓർ ചടങ്ങിൽ പങ്കെടുക്കാനും അവസരമുണ്ട്.

ഏറ്റവും കൂടുതൽ തവണ (8 തവണ) ബാലൺ ഡി ഓർ നേടിയ റെക്കോർഡ് മെസ്സിക്കാണെങ്കിലും, വോട്ടെടുപ്പിൽ താരം രണ്ടാമതാണ് ഫിനിഷ് ചെയ്തത്. മാഞ്ചസ്റ്റർ യുണൈറ്റഡിനായി 2007-08 സീസണിൽ എല്ലാ മത്സരങ്ങളിലുമായി 42 ഗോളുകൾ നേടി ക്രിസ്റ്റ്യാനോ പുറത്തെടുത്ത അത്യുജ്ജ്വല പ്രകടനമാണ് താരത്തെ ഈ പുരസ്കാരത്തിന് അർഹനാക്കിയത്. ഇതോടെ ജോർജ് ബെസ്റ്റ്, സർ ബോബി ചാൾട്ടൺ തുടങ്ങിയ യുണൈറ്റഡ് ഇതിഹാസങ്ങളുടെ നിരയിൽ ക്രിസ്റ്റ്യാനോ മുൻപന്തിയിലെത്തി. മെസ്സിയുടെ 2012-ലെ പ്രകടനമാണ് രണ്ടാം സ്ഥാനത്തെത്തിയത്.

അതേസമയം, സസ്പെൻഷനിലായിരുന്ന ക്രിസ്റ്റ്യാനോ പോർച്ചുഗീസ് ദേശീയ ടീമിലേക്ക് തിരിച്ചെത്താനുള്ള വഴിയൊരുങ്ങി. അടുത്ത മാസം നടക്കുന്ന യുവേഫ നേഷൻസ് ലീഗ് മത്സരങ്ങൾക്കുള്ള പോർച്ചുഗലിന്റെ പ്രാഥമിക ടീമിൽ താരത്തെ ഉൾപ്പെടുത്തിയിട്ടുണ്ട്. നേഷൻസ് ലീഗിനിടെ സെപ്റ്റംബർ 30-ന് പരിശീലകനുമായുള്ള അഭിപ്രായവ്യത്യാസത്തെ തുടർന്ന് അനുമതിയില്ലാതെ ക്യാമ്പ് വിട്ടതിനാണ് താരത്തിന് 30 ദിവസത്തെ സസ്പെൻഷൻ ലഭിച്ചത്. സസ്പെൻഷൻ മുൻകാല പ്രാബല്യത്തോടെ കണക്കാക്കിയതിനാൽ ഈ ആഴ്ച അവസാനത്തോടെ ക്രിസ്റ്റ്യാനോയ്ക്ക് വീണ്ടും ടീമിലേക്ക് തിരിച്ചെത്താം. ഡെൻമാർക്ക്, വെയിൽസ് ടീമുകൾക്കെതിരായ മത്സരങ്ങളിൽ താരം കളിച്ചേക്കും. അനുമതിയില്ലാതെ ക്യാമ്പ് വിട്ടതിൽ ക്രിസ്റ്റ്യാനോ ആരാധകരോട് ക്ഷമാപണം നടത്തിയിരുന്നു.