ഫിൻടെക് രംഗത്ത് വിപ്ലവകരമായ കുതിച്ചുചാട്ടത്തിന് ബഹ്റൈൻ; നിക്ഷേപം മൂന്നിരട്ടിയാക്കും

പ്രദീപ് പുറവങ്കര

മനാമ: മേഖലയിലെ പ്രധാന സാമ്പത്തിക കേന്ദ്രമെന്ന പദവി കൂടുതൽ ഉറപ്പിച്ചുനിർത്താൻ ലക്ഷ്യമിട്ട് ഫിനാൻഷ്യൽ ടെക്നോളജി (ഫിൻടെക്) രംഗത്തെ നിക്ഷേപം അടുത്ത മൂന്ന് വർഷത്തിനുള്ളിൽ മൂന്നിരട്ടിയാക്കാൻ ബഹ്റൈൻ സെൻട്രൽ ബാങ്ക് (സിബിബി) തീരുമാനിച്ചു. എക്സിബിഷൻ വേൾഡ് ബഹ്റൈനിൽ സംഘടിപ്പിച്ച 'ഫിൻടെക് ഫോർവേഡ് 2026' നാലാം പതിപ്പിലാണ് ഈ സുപ്രധാന പ്രഖ്യാപനമുണ്ടായത്.

ആർട്ടിഫിഷ്യൽ ഇന്റലിജൻസ്, ഡിജിറ്റൽ പേയ്മെന്റുകൾ, സ്റ്റേബിൾകോയിനുകൾ എന്നിവ ആഗോള സാമ്പത്തിക വ്യവസ്ഥയെ മാറ്റിമറിക്കുന്ന കാലഘട്ടത്തിലൂടെയാണ് നാം കടന്നുപോകുന്നതെന്ന് ഉച്ചകോടി ഉദ്ഘാടനം ചെയ്തുകൊണ്ട് ധനകാര്യ, ദേശീയ സമ്പദ്‌വ്യവസ്ഥ മന്ത്രി ശൈഖ് സൽമാൻ ബിൻ ഖലീഫ അൽ ഖലീഫ പറഞ്ഞു. ആഗോളതലത്തിൽ സാങ്കേതികവിദ്യ വളരുമ്പോഴും 130 കോടി ആളുകൾക്ക് ഇപ്പോഴും ബാങ്കിംഗ് സേവനങ്ങൾ ലഭ്യമല്ലെന്നും, ഈ ഡിജിറ്റൽ ഇടവേള നികത്താൻ അന്താരാഷ്ട്ര സഹകരണം അത്യാവശ്യമാണെന്നും അദ്ദേഹം ചൂണ്ടിക്കാട്ടി.

ഉച്ചകോടിയുടെ ഭാഗമായി 60-ലധികം പുതിയ പങ്കാളിത്ത കരാറുകൾ പ്രഖ്യാപിക്കുമെന്ന് വ്യക്തമാക്കിയ ധനമന്ത്രി, സാങ്കേതിക മുന്നേറ്റങ്ങളും സുരക്ഷയും ഒരുപോലെ ഉറപ്പാക്കാൻ വ്യക്തവും അയവുള്ളതുമായ നിയന്ത്രണങ്ങളാണ് ആവശ്യമെന്ന് കൂട്ടിച്ചേർത്തു. ഡിജിറ്റൽ പരിവർത്തനത്തിലൂടെ വളർച്ചയും സാമ്പത്തിക സ്ഥിരതയും ഒരുപോലെ കൈവരിക്കാൻ സാധിക്കുമെന്ന് സിബിബി ഗവർണർ ഖാലിദ് ഹുമൈദാൻ വ്യക്തമാക്കി. നിലവിൽ ബഹ്റൈന്റെ ജിഡിപിയുടെ 20 ശതമാനത്തോളം സംഭാവന ചെയ്യുന്നത് സാമ്പത്തിക മേഖലയാണെന്നും ഇത് തുടരുമെന്നും അദ്ദേഹം പറഞ്ഞു.

ബഹ്റൈനിലെ ഫിനാൻഷ്യൽ സെക്ടർ തൊഴിൽ ശക്തിയുടെ 70 ശതമാനവും പ്രാദേശിക പ്രതിഭകളാണെന്ന് സുസ്ഥിര വികസന മന്ത്രിയും ബഹ്റൈൻ സാമ്പത്തിക വികസന ബോർഡ് (ഇഡിബി) ചീഫ് എക്സിക്യൂട്ടീവ് ഓഫീസറുമായ നൂർ അൽ ഖുലൈഫ് ചൂണ്ടിക്കാട്ടി. വിദേശ നിക്ഷേപകർക്ക് അന്താരാഷ്ട്ര തലത്തിൽ സുരക്ഷിതമായി വ്യവസായം വളർത്താൻ കഴിയുന്ന മികച്ച അടിത്തറയായി ബഹ്റൈൻ മാറിയെന്നും അവർ വ്യക്തമാക്കി.