യുകെ ഡെപ്യൂട്ടി ചീഫ് ഓഫ് ഡിഫൻസ് സ്റ്റാഫുമായി കൂടിക്കാഴ്ച നടത്തി ഹമദ് രാജാവ്
പ്രദീപ് പുറവങ്കര
മനാമ: ബഹ്റൈൻ സന്ദർശനത്തിനെത്തിയ യുകെ ഡെപ്യൂട്ടി ചീഫ് ഓഫ് ഡിഫൻസ് സ്റ്റാഫ് (മിലിട്ടറി സ്ട്രാറ്റജി ആൻഡ് ഓപ്പറേഷൻസ്) ലഫ്റ്റനന്റ് ജനറൽ സർ ചാർലി കോളിൻസുമായി ബഹ്റൈൻ ഭരണാധികാരിയും സായുധ സേനയുടെ സുപ്രീം കമാൻഡറുമായ ഹിസ് മജസ്റ്റി ഹമദ് ബിൻ ഈസാ അൽ ഖലീഫ രാജാവ് കൂടിക്കാഴ്ച നടത്തി.
ബഹ്റൈനും യുണൈറ്റഡ് കിംഗ്ഡവും തമ്മിലുള്ള ശക്തമായ ഉഭയകക്ഷി ബന്ധത്തെയും പങ്കാളിത്തത്തെയും ഹമദ് രാജാവ് ചടങ്ങിൽ പ്രശംസിച്ചു. പ്രതിരോധ, സൈനിക മേഖലകളിൽ ഇരുരാജ്യങ്ങളും തമ്മിൽ നിലനിൽക്കുന്ന ദീർഘകാല സഹകരണവും ഏകോപനവും അദ്ദേഹം എടുത്തുപറഞ്ഞു.
ഇരുരാജ്യങ്ങളുടെയും പൊതുവായ ലക്ഷ്യങ്ങളെയും താൽപ്പര്യങ്ങളെയും പിന്തുണയ്ക്കുന്നതിനും ജനങ്ങൾക്ക് പ്രയോജനകരമാകുന്ന രീതിയിലും എല്ലാ തലങ്ങളിലും ബന്ധം കൂടുതൽ വികസിപ്പിക്കാനുള്ള ഇരുരാജ്യങ്ങളുടെയും പ്രതിജ്ഞാബദ്ധത രാജാവ് ഊന്നിപ്പറഞ്ഞു. മേഖലയിലും അന്താരാഷ്ട്രതലത്തിലും സുരക്ഷയും സ്ഥിരതയും പ്രോത്സാഹിപ്പിക്കുന്നതിന് യുണൈറ്റഡ് കിംഗ്ഡം നടത്തുന്ന ശ്രമങ്ങളെയും അദ്ദേഹം അഭിനന്ദിച്ചു.
മേഖലയിലെ ഏറ്റവും പുതിയ സംഭവവികാസങ്ങൾ, പ്രാദേശിക-അന്തർദേശീയ വിഷയങ്ങൾ, പരസ്പര താൽപ്പര്യമുള്ള മറ്റ് കാര്യങ്ങൾ എന്നിവ കൂടിക്കാഴ്ചയിൽ ചർച്ചയായി. ബഹ്റൈനും യുകെയും തമ്മിലുള്ള ചരിത്രപരമായ സൗഹൃദവും പ്രതിരോധ-സൈനിക സഹകരണവും ശക്തിപ്പെടുത്തുന്നതിന് ഹമദ് രാജാവ് നൽകുന്ന പിന്തുണയ്ക്ക് ലഫ്റ്റനന്റ് ജനറൽ സർ ചാർലി കോളിൻസ് നന്ദി രേഖപ്പെടുത്തി.
dsgdg
