കുവൈറ്റിനെതിരെയുള്ള ഇറാൻ ആക്രമണം: ശക്തമായി അപലപിച്ച് ബഹ്റൈൻ; യു.എൻ ഇടപെടൽ ആവശ്യപ്പെട്ടു
പ്രദീപ് പുറവങ്കര
കുവൈറ്റിലെ ജനവാസ കേന്ദ്രങ്ങൾക്കും സുപ്രധാന കേന്ദ്രങ്ങൾക്കും നേരെ ഇറാൻ നടത്തുന്ന ആവർത്തിച്ചുള്ള ആക്രമണങ്ങളെ ബഹ്റൈൻ ശക്തമായി അപലപിക്കുകയും അയൽരാജ്യത്തിന് പൂർണ്ണ ഐക്യദാർഢ്യം പ്രഖ്യാപിക്കുകയും ചെയ്തു. വടക്കൻ കുവൈറ്റിലെ ഒരു ചൈനീസ് കമ്പനിയുടെ കെട്ടിടത്തിന് നേരെ ഉണ്ടായ ആക്രമണത്തിൽ ഒരു തൊഴിലാളി കൊല്ലപ്പെടുകയും വലിയ തോതിൽ ഭൗതിക നാശനഷ്ടങ്ങൾ സംഭവിക്കുകയും ചെയ്തതായി ബഹ്റൈൻ വിദേശകാര്യ മന്ത്രാലയം അറിയിച്ചു.
ഈ സംഭവം കുവൈറ്റിന്റെ പരമാധികാരത്തിന്മേലുള്ള ലംഘനവും സിവിലിയന്മാരുടെ സുരക്ഷയ്ക്കുള്ള ഭീഷണിയുമാണെന്ന് ബഹ്റൈൻ ചൂണ്ടിക്കാട്ടി. ഇത് അന്താരാഷ്ട്ര നിയമങ്ങളുടെയും യു.എൻ ചാർട്ടറിന്റെയും ഐക്യരാഷ്ട്രസഭ രക്ഷാസമിതിയുടെ 2817-ാം നമ്പർ പ്രമേയത്തിന്റെയും പരസ്യമായ ലംഘനമാണ്. കുവൈറ്റിന്റെ പരമാധികാരവും സുരക്ഷയും അതിർത്തിയും സംരക്ഷിക്കാൻ അവർ സ്വീകരിക്കുന്ന എല്ലാ നിയമപരമായ നടപടികൾക്കും ബഹ്റൈന്റെ പൂർണ്ണ പിന്തുണയുണ്ടാകും.
കുവൈറ്റിന്റെ സുരക്ഷ ബഹ്റൈന്റെയും മറ്റ് ജി.സി.സി (GCC) രാജ്യങ്ങളുടെയും സുരക്ഷയുമായി നേരിട്ട് ബന്ധപ്പെട്ടിരിക്കുന്നതാണെന്ന് വിദേശകാര്യ മന്ത്രാലയം വ്യക്തമാക്കി. പൗരന്മാരുടെയും അന്തേവാസികളുടെയും സംരക്ഷണത്തിനായി കുവൈറ്റ് ആംഡ് ഫോഴ്സും മറ്റ് അധികാരികളും നടത്തുന്ന പരിശ്രമങ്ങളെ ബഹ്റൈൻ പ്രശംസിച്ചു. കൊല്ലപ്പെട്ട തൊഴിലാളിയുടെ കുടുംബത്തോട് അനുശോചനം അറിയിച്ച മന്ത്രാലയം, ബാധിക്കപ്പെട്ട എല്ലാവരുടെയും സുരക്ഷയ്ക്കായി ആശംസകൾ നേർന്നു.
അന്താരാഷ്ട്ര നിയമങ്ങൾ പാലിക്കപ്പെടുന്നുണ്ടെന്ന് ഉറപ്പാക്കാനും തുടർന്നുള്ള ആക്രമണങ്ങൾ തടയാനും ഐക്യരാഷ്ട്രസഭയുടെ രക്ഷാസമിതി ഉൾപ്പെടെയുള്ള അന്താരാഷ്ട്ര സമൂഹം അടിയന്തിരവും നിർണായകവുമായ നടപടികൾ സ്വീകരിക്കണമെന്ന് ബഹ്റൈൻ ആവശ്യപ്പെട്ടു. മേഖലയിലെ സ്ഥിരത ഉറപ്പാക്കുന്നതിനും സമുദ്ര ഗതാഗതത്തിന്റെ സുരക്ഷ ഉറപ്പുവരുത്തുന്നതിനും അടിയന്തര ഇടപെടൽ അനിവാര്യമാണെന്ന് വിദേശകാര്യ മന്ത്രാലയം കൂട്ടിച്ചേർത്തു.
bcvb
