സുരക്ഷാ സഹകരണം ശക്തമാക്കാൻ ബഹ്റൈനും കുവൈത്തും ധാരണ; ബഹ്റൈൻ ആഭ്യന്തര മന്ത്രി കുവൈത്തിൽ ചർച്ച നടത്തി
പ്രദീപ് പുറവങ്കര
കുവൈത്ത് സിറ്റി: ഇരുരാജ്യങ്ങളും തമ്മിലുള്ള ഉഭയകക്ഷി ബന്ധവും സുരക്ഷാ സഹകരണവും കൂടുതൽ ശക്തമാക്കാൻ ബഹ്റൈനും കുവൈത്തും ധാരണയായി. ബഹ്റൈൻ ആഭ്യന്തര മന്ത്രി ജനറൽ ഷെയ്ഖ് റാഷിദ് ബിൻ അബ്ദുള്ള അൽ ഖലീഫ കുവൈത്തിൽ എത്തി ഉന്നതതല ചർച്ചകൾ നടത്തി.
കുവൈത്ത് കിരീടാവകാശി ഷെയ്ഖ് സബാഹ് ഖാലിദ് അൽ-ഹമദ് അൽ-സബാഹുമായി അദ്ദേഹം കൂടിക്കാഴ്ച നടത്തി. ബഹ്റൈൻ രാജാവ് ഹിസ് മജസ്റ്റി കിങ് ഹമദ് ബിൻ ഈസ അൽ ഖലീഫ, കിരീടാവകാശിയും പ്രധാനമന്ത്രിയുമായ ഹിസ് റോയൽ ഹൈനസ് പ്രിൻസ് സൽമാൻ ബിൻ ഹമദ് അൽ ഖലീഫ എന്നിവരുടെ ആശംസകൾ അദ്ദേഹം കുവൈത്ത് നേതൃത്വത്തെ അറിയിച്ചു.
തുടർന്ന് കുവൈത്ത് ആക്ടിങ് പ്രധാനമന്ത്രിയും ആഭ്യന്തര മന്ത്രിയുമായ ഷെയ്ഖ് ഫഹദ് യൂസഫ് സൗദ് അൽ സബാഹുമായും ബഹ്റൈൻ ആഭ്യന്തര മന്ത്രി ചർച്ച നടത്തി. ഗൾഫ് മേഖലയിലെ സുരക്ഷാ സംയോജനം ശക്തമാക്കുന്നതിനെക്കുറിച്ചും നിലവിലെ വെല്ലുവിളികളെ ഒത്തൊരുമയോടെ നേരിടുന്നതിനെക്കുറിച്ചും ഇരുനേതാക്കളും സംസാരിച്ചു. ബഹ്റൈന്റെ സുരക്ഷാ ശ്രമങ്ങൾക്ക് കുവൈത്ത് പൂർണ്ണ പിന്തുണ പ്രഖ്യാപിച്ചു. ഇരുരാജ്യങ്ങളും തമ്മിലുള്ള ചരിത്രപരമായ ബന്ധം അറേബ്യൻ ഗൾഫ് മേഖലയിലെ സമാധാനവും സുസ്ഥിരതയും നിലനിർത്തുന്നതിൽ നിർണായകമാണെന്ന് യോഗം വിലയിരുത്തി.
sdfdsf
