ദമ്മാം വഴിയുള്ള സർവീസുകൾ ഏപ്രിൽ വരെ നീട്ടി ഗൾഫ് എയർ
പ്രദീപ് പുറവങ്കര I ബഹ്റൈൻ
മനാമ: ബഹ്റൈന്റെ ദേശീയ വിമാനക്കമ്പനിയായ ഗൾഫ് എയർ, ദമ്മാം കിംഗ് ഫഹദ് അന്താരാഷ്ട്ര വിമാനത്താവളം കേന്ദ്രീകരിച്ച് നടത്തുന്ന താൽക്കാലിക സർവീസുകൾ ഏപ്രിൽ മാസം വരെ നീട്ടിയതായി പ്രഖ്യാപിച്ചു. മേഖലയിലെ നിലവിലെ സാഹചര്യങ്ങൾ കണക്കിലെടുത്ത് ബഹ്റൈൻ ഉൾപ്പെടെയുള്ള ചില രാജ്യങ്ങളുടെ വ്യോമപാതകളിൽ ഏർപ്പെടുത്തിയിട്ടുള്ള നിയന്ത്രണങ്ങളെത്തുടർന്നാണ് ദമ്മാം വഴിയുള്ള ഈ പ്രത്യേക ക്രമീകരണം തുടരുന്നത്.
പുതുക്കിയ സമയക്രമം അനുസരിച്ച്, ദമ്മാം - ലണ്ടൻ (ഹീത്രൂ) സർവീസുകൾ 2026 ഏപ്രിൽ 11 വരെ തുടരും. മുംബൈ, ചെന്നൈ, കെയ്റോ, നെയ്റോബി, ബാങ്കോക്ക്, കാസാബ്ലാങ്ക, മനില എന്നിവിടങ്ങളിലേക്കുള്ള സർവീസുകൾ ഏപ്രിൽ 30 വരെ നീട്ടിയിട്ടുണ്ട്. നിലവിൽ പത്ത് പ്രധാന ലക്ഷ്യസ്ഥാനങ്ങളിലേക്കാണ് ദമ്മാം വഴി ഗൾഫ് എയർ സർവീസ് നടത്തുന്നത്.
ബഹ്റൈനിൽ നിന്ന് ദമ്മാം വിമാനത്താവളത്തിലേക്കും തിരിച്ചും യാത്ര ചെയ്യുന്നവർക്കായി ഗൾഫ് എയർ പ്രത്യേക ഗതാഗത സൗകര്യം ഒരുക്കും. കൂടാതെ, ബഹ്റൈനിൽ നിന്നുള്ള യാത്രക്കാർക്കായി സൗദി അറേബ്യ വഴി ട്രാൻസിറ്റ് വിസ ലഭിക്കുന്നതിനായുള്ള സഹായവും എയർലൈൻ വാഗ്ദാനം ചെയ്യുന്നുണ്ട്. അതേസമയം സൗദി അറേബ്യ ലക്ഷ്യസ്ഥാനമായി യാത്ര ചെയ്യുന്നവർ സ്വന്തം നിലയിൽ എൻട്രി വിസ ഉറപ്പുവരുത്തേണ്ടതുണ്ട്.
യാത്രക്കാർക്ക് ഗൾഫ് എയർ വെബ്സൈറ്റ് (gulfair.com), മൊബൈൽ ആപ്പ് അല്ലെങ്കിൽ അംഗീകൃത ട്രാവൽ ഏജന്റുകൾ വഴി ടിക്കറ്റുകൾ ബുക്ക് ചെയ്യാവുന്നതാണ്. മേഖലയിലെ അപ്രതീക്ഷിത സാഹചര്യങ്ങളിൽ യാത്രക്കാർക്ക് തടസ്സമില്ലാത്ത സേവനം ഉറപ്പാക്കുകയാണ് ഈ നീക്കത്തിലൂടെ ലക്ഷ്യമിടുന്നതെന്ന് കമ്പനി വ്യക്തമാക്കി.
dqwaqwsaq
