74 മിസൈലുകളും 95 ഡ്രോണുകളും തകർത്തു; ബഹ്റൈൻ വ്യോമപ്രതിരോധ സേന അതീവ ജാഗ്രതയിൽ
പ്രദീപ് പുറവങ്കര I ബഹ്റൈൻ
മനാമ: രാജ്യത്തിന് നേരെയുള്ള ഇറാനിയൻ ആക്രമണങ്ങളെ നേരിടാൻ ബഹ്റൈൻ ഡിഫൻസ് ഫോഴ്സിന്റെ (BDF) വ്യോമപ്രതിരോധ സംവിധാനങ്ങൾ സജ്ജമാണെന്ന് ജനറൽ കമാൻഡ് അറിയിച്ചു. ആക്രമണം ആരംഭിച്ചതുമുതൽ ഇതുവരെ ശത്രുക്കളുടെ 74 മിസൈലുകളും 95 ഡ്രോണുകളും കാര്യക്ഷമമായി തകർക്കാൻ പ്രതിരോധ സംവിധാനങ്ങൾക്ക് സാധിച്ചതായി അധികൃതർ വ്യക്തമാക്കി. മിസൈലുകൾക്കും ഡ്രോണുകൾക്കും എതിരെ തൽക്ഷണവും നിർണ്ണായകവുമായ മറുപടി നൽകാൻ സൈന്യം സജ്ജമാണ്.
ആക്രമണമുണ്ടായ സ്ഥലങ്ങൾ ഉടനടി സുരക്ഷിതമാക്കാൻ പ്രത്യേക ഫീൽഡ് ടീമുകൾ സജ്ജമാണെന്ന് ബി.ഡി.എഫ് ജനറൽ കമാൻഡ് ഉറപ്പുനൽകി. ജനങ്ങൾ വീടുകളിൽ തന്നെ തുടരണമെന്നും അത്യന്താപേക്ഷിതമായ കാര്യങ്ങൾക്കല്ലാതെ പുറത്തിറങ്ങരുതെന്നും നിർദ്ദേശമുണ്ട്. അതീവ ജാഗ്രത പാലിക്കണമെന്നും ഔദ്യോഗിക സ്രോതസ്സുകളിൽ നിന്നുള്ള വിവരങ്ങൾ മാത്രം വിശ്വസിക്കണമെന്നും അധികൃതർ അഭ്യർത്ഥിച്ചു. സൈനിക നീക്കങ്ങൾ ചിത്രീകരിക്കാനോ സോഷ്യൽ മീഡിയ വഴി കിംവദന്തികൾ പ്രചരിപ്പിക്കാനോ പാടില്ല.
ജനവാസ മേഖലകളെ ലക്ഷ്യമിട്ടുള്ള വിവേചനരഹിതമായ മിസൈൽ-ഡ്രോൺ ആക്രമണങ്ങൾ അന്താരാഷ്ട്ര മാനുഷിക നിയമങ്ങളുടെയും ഐക്യരാഷ്ട്ര സഭയുടെ ചാർട്ടറിന്റെയും ലംഘനമാണെന്ന് ബി.ഡി.എഫ് ചൂണ്ടിക്കാട്ടി. രാജ്യത്തിന്റെ പരമാധികാരവും സുരക്ഷയും സംരക്ഷിക്കുന്നതിനായി ആവശ്യമായ എല്ലാ നടപടികളും സ്വീകരിക്കാൻ ബഹ്റൈന് അവകാശമുണ്ടെന്നും ജനറൽ കമാൻഡ് വാർത്താക്കുറിപ്പിൽ വ്യക്തമാക്കി.
dfgg
