റെക്കോർഡുകൾ തകർത്ത് ലയണൽ മെസ്സിയുടെ കുതിപ്പ്; ഫിഫ ലോകകപ്പിലെ ഗോൾഡൻ ബൂട്ട് പോരാട്ടം പുതിയ തലത്തിലേക്ക്
ഷീബ വിജയൻ
ഫിഫ ലോകകപ്പിലെ ഗോൾഡൻ ബൂട്ടിനായുള്ള പോരാട്ടം ആവേശകരമായ ഘട്ടത്തിലേക്ക് കടക്കുന്നു. ആദ്യ മത്സരങ്ങളിൽ തന്നെ മികച്ച പ്രകടനവുമായി അർജന്റീന നായകൻ ലയണൽ മെസ്സിയാണ് നിലവിൽ അഞ്ച് ഗോളുകളോടെ ഗോൾ വേട്ടക്കാരുടെ പട്ടികയിൽ ഒന്നാമതുള്ളത്. രണ്ട് മത്സരങ്ങളിൽ നിന്നാണ് 39-കാരനായ താരം ഈ നേട്ടം കൊയ്തത്; അൽജീരിയക്കെതിരെ ഹാട്രിക്കും ഓസ്ട്രിയക്കെതിരെ ഇരട്ട ഗോളുകളും താരം സ്വന്തമാക്കി. ഇതോടെ ലോകകപ്പ് ചരിത്രത്തിലെ എക്കാലത്തെയും മികച്ച ഗോൾ വേട്ടക്കാരനെന്ന റെക്കോർഡും മെസ്സി സ്വന്തം പേരിലാക്കി. എന്നാൽ മെസ്സിക്ക് വെല്ലുവിളിയുമായി നാല് ഗോളുകൾ വീതം നേടി ബ്രസീലിന്റെ വിനീഷ്യസ് ജൂനിയർ, നോർവേയുടെ എർലിങ് ഹാലാൻഡ്, ഫ്രഞ്ച് സൂപ്പർ താരം കിലിയൻ എംബാപ്പെ എന്നിവർ തൊട്ടുപിന്നിലുണ്ട്. സ്കോട്ട്ലൻഡിനെതിരെ നെയ്മർ ജൂനിയർ ഇരട്ട ഗോളുകൾ നേടിയ മത്സരത്തിൽ വിനീഷ്യസും തിളങ്ങിയതോടെയാണ് താരത്തിന്റെ ഗോൾ നേട്ടം നാലായത്. ഇറാഖ്, സെനഗൽ ടീമുകൾക്കെതിരെ ഇരട്ട ഗോളുകൾ വീതമടിച്ചാണ് ഹാലാൻഡും എംബാപ്പെയും പട്ടികയിൽ സജീവമായത്. ജർമ്മനിയുടെ ഡെനിസ് ഉൻഡാവ്, കാനഡയുടെ ജോനാഥൻ ഡേവിഡ് എന്നിവർ മൂന്ന് ഗോളുകളുമായി മൂന്നാം സ്ഥാനത്തുണ്ട്. മൊറോക്കോയുടെ ഇസ്മായിൽ സൈബാരി, ബ്രസീലിന്റെ മാത്യൂസ് കുഞ്ഞ, സ്വിറ്റ്സർലൻഡിന്റെ ജോഹാൻ മൻസാമ്പി എന്നിവരും മൂന്ന് ഗോളുകൾ നേടിയിട്ടുണ്ട്. ക്രിസ്റ്റ്യാനോ റൊണാൾഡോ, ഹാരി കെയ്ൻ, കോഡി ഗാക്പോ, മിക്കൽ ഒയാർസബൽ എന്നിവർ രണ്ട് ഗോളുകളോടെ തൊട്ടുപിന്നിലുണ്ട്. ഗ്രൂപ്പ് ഘട്ടത്തിലെ മൂന്നാം റൗണ്ട് പോരാട്ടങ്ങളിൽ ഇന്ന് സ്വിറ്റ്സർലൻഡ് കാനഡയെയും, ബോസ്നിയ ഖത്തറിനെയും നേരിടും.
qswqwsawqs
