ബഹ്റൈനിൽ വാറ്റ് രജിസ്ട്രേഷൻ 27,000 കടന്നു; നിയമലംഘകർക്ക് കടുത്ത ശിക്ഷ
പ്രദീപ് പുറവങ്കര I ബഹ്റൈൻ
ബഹ്റൈനിൽ മൂല്യവർദ്ധിത നികുതി (VAT) രജിസ്ട്രേഷൻ നടപടികളോട് ബിസിനസ് സ്ഥാപനങ്ങൾ മികച്ച രീതിയിൽ സഹകരിക്കുന്നതായി നാഷണൽ ബ്യൂറോ ഫോർ റെവന്യൂ (NBR) അറിയിച്ചു. 2025 അവസാനത്തോടെ രാജ്യത്ത് വാറ്റ് രജിസ്റ്റർ ചെയ്ത സ്ഥാപനങ്ങളുടെ എണ്ണം 27,070 പിന്നിട്ടു. രാജ്യത്തെ നികുതി നിയമങ്ങൾ നടപ്പിലാക്കുന്നതിൽ സാമ്പത്തിക മേഖലയിലുള്ളവർ കാണിക്കുന്ന ക്രിയാത്മകമായ പിന്തുണയെ എൻ.ബി.ആർ അഭിനന്ദിച്ചു.
കഴിഞ്ഞ 12 മാസ കാലയളവിലെ വിറ്റുവരവ് 37,500 ബഹ്റൈൻ ദിനാർ കവിഞ്ഞവരോ, വരാനിരിക്കുന്ന 12 മാസത്തിനുള്ളിൽ ഇത്രയും തുക വിറ്റുവരവ് പ്രതീക്ഷിക്കുന്നവരോ ആയ എല്ലാ സ്ഥാപനങ്ങളും വാറ്റ് രജിസ്ട്രേഷൻ എടുക്കേണ്ടത് നിർബന്ധമാണ്. രജിസ്ട്രേഷൻ നടപടികൾ പൂർത്തിയാക്കാത്തത് നികുതി വെട്ടിപ്പായി കണക്കാക്കുമെന്നും ഇതിന് കടുത്ത ശിക്ഷാനടപടികൾ നേരിടേണ്ടി വരുമെന്നും അധികൃതർ മുന്നറിയിപ്പ് നൽകി. വാറ്റ് നിയമത്തിലെ 63, 64 വകുപ്പുകൾ പ്രകാരം നികുതി വെട്ടിപ്പ് നടത്തുന്നവർക്ക് അഞ്ച് വർഷം വരെ തടവും വെട്ടിച്ച നികുതിയുടെ ആറ് മടങ്ങ് വരെ പിഴയും ചുമത്താൻ വ്യവസ്ഥയുണ്ട്.
തുടർച്ചയായി ലാഭമുണ്ടാക്കുന്ന വാണിജ്യ, വ്യവസായ, കാർഷിക, പ്രൊഫഷണൽ സേവന മേഖലകളിലെല്ലാം നികുതി നിയമം ബാധകമാണ്. അഭിഭാഷകർ, റിയൽ എസ്റ്റേറ്റ് ബ്രോക്കർമാർ, ഫാഷൻ ഡിസൈനർമാർ, ബ്യൂട്ടി സർവീസുകൾ, ഇവന്റ് മാനേജ്മെന്റ്, വാഹന റിപ്പയറിംഗ്, മാൻപവർ സപ്ലൈ തുടങ്ങിയ തൊഴിലുകളിൽ ഏർപ്പെട്ടിരിക്കുന്നവരും ഇതിൽ ഉൾപ്പെടുന്നു.
trdtdrt
