ബഹ്റൈൻ കിരീടാവകാശിയും കുവൈത്ത് അമീറും കൂടിക്കാഴ്ച നടത്തി
പ്രദീപ് പുറവങ്കര I ബഹ്റൈൻ:
കുവൈത്ത് സിറ്റി: ഔദ്യോഗിക സന്ദർശനാർത്ഥം കുവൈത്തിലെത്തിയ ബഹ്റൈൻ കിരീടാവകാശിയും പ്രധാനമന്ത്രിയുമായ ഹിസ് റോയൽ ഹൈനസ് പ്രിൻസ് സൽമാൻ ബിൻ ഹമദ് അൽ ഖലീഫ, കുവൈത്ത് അമീർ ഹിസ് ഹൈനസ് ശൈഖ് മിശ്അൽ അൽ അഹമ്മദ് അൽ ജാബർ അൽ സബാഹുമായി കൂടിക്കാഴ്ച നടത്തി. ഇരുരാജ്യങ്ങളും തമ്മിലുള്ള ചരിത്രപരമായ ബന്ധം കൂടുതൽ മേഖലകളിലേക്ക് വ്യാപിപ്പിക്കുന്നതിനെക്കുറിച്ച് ഇരുനേതാക്കളും ചർച്ച ചെയ്തു.
ബഹ്റൈൻ രാജാവ് ഹിസ് മജസ്റ്റി കിങ് ഹമദ് ബിൻ ഈസ അൽ ഖലീഫയുടെയും കുവൈത്ത് അമീർ ശൈഖ് മിശ്അൽ അൽ അഹമ്മദ് അൽ ജാബർ അൽ സബാഹിന്റെയും നേതൃത്വത്തിൽ ഇരുരാജ്യങ്ങളും തമ്മിലുള്ള ബന്ധം പുതിയ ഉയരങ്ങളിലേക്ക് കുതിക്കുകയാണെന്ന് പ്രിൻസ് സൽമാൻ ബിൻ ഹമദ് അൽ ഖലീഫ കൂടിക്കാഴ്ചയിൽ പറഞ്ഞു. ഇരുരാജ്യങ്ങളിലെയും ജനങ്ങൾക്ക് ഗുണകരമാകുന്ന രീതിയിലുള്ള തന്ത്രപരമായ പങ്കാളിത്തം കൂടുതൽ ശക്തിപ്പെടുത്തേണ്ടതിന്റെ പ്രാധാന്യം അദ്ദേഹം ഊന്നിപ്പറഞ്ഞു.
കൂടിക്കാഴ്ചയിൽ ഹിസ് മജസ്റ്റി കിങ് ഹമദ് ബിൻ ഈസ അൽ ഖലീഫയുടെ ആശംസകൾ കിരീടാവകാശി കുവൈത്ത് അമീറിനെ അറിയിച്ചു. കുവൈത്തിന്റെ പുരോഗതിക്കും ഐശ്വര്യത്തിനുമുള്ള ബഹ്റൈൻ രാജാവിന്റെ പ്രത്യേക താല്പര്യവും അദ്ദേഹം കൈമാറി. മറുപടിയായി, കുവൈത്ത് അമീർ കിങ് ഹമദ് ബിൻ ഈസ അൽ ഖലീഫയ്ക്കും ബഹ്റൈനിലെ ജനങ്ങൾക്കും തന്റെ സ്നേഹാന്വേഷണങ്ങളും ആശംസകളും അറിയിച്ചു.
വിവിധ മേഖലകളിലെ സഹകരണം മെച്ചപ്പെടുത്തുന്നതിനെക്കുറിച്ചും പൊതുവായ താല്പര്യമുള്ള പ്രാദേശിക വിഷയങ്ങളെക്കുറിച്ചും ഇരുനേതാക്കളും ആശയവിനിമയം നടത്തി. എല്ലാ തലങ്ങളിലും കുവൈത്തുമായുള്ള പങ്കാളിത്തം വർദ്ധിപ്പിക്കാൻ ബഹ്റൈൻ പ്രതിജ്ഞാബദ്ധമാണെന്ന് കിരീടാവകാശി വ്യക്തമാക്കി. കുവൈത്ത് കിരീടാവകാശി ഹിസ് ഹൈനസ് ശൈഖ് സബാഹ് അൽ ഖാലിദ് അൽ ഹമദ് അൽ മുബാറക് അൽ സബാഹും കൂടിക്കാഴ്ചയിൽ സന്നിഹിതനായിരുന്നു.
