ചരിത്രനേട്ടവുമായി ജിയോ ഐ.പി.ഒ; ആദ്യ ദിനം തന്നെ ലഭിച്ചത് പത്ത് ലക്ഷത്തിലധികം അപേക്ഷകൾ

ഷീബ വിജയൻ

മുംബൈ: ഇന്ത്യൻ ഓഹരി വിപണിയെ വിസ്മയിപ്പിച്ചുകൊണ്ട് റിലയൻസ് ജിയോ പ്ലാറ്റ്‌ഫോംസിന്റെ പ്രാരംഭ ഓഹരി വിൽപനയ്ക്ക് (ഐ.പി.ഒ) നിക്ഷേപകരിൽ നിന്നും അഭൂതപൂർവ്വമായ പ്രതികരണമാണ് ലഭിക്കുന്നത്. ആകെ 30,213 കോടി രൂപ സമാഹരിക്കാൻ ലക്ഷ്യമിട്ടിറങ്ങിയ ഈ മെഗാ ഐ.പി.ഒ, ബുധനാഴ്ച ആരംഭിച്ച് വെറും 100 മിനിറ്റിനുള്ളിൽ തന്നെ പൂർണമായും സബ്‌സ്‌ക്രൈബ് ചെയ്യപ്പെട്ടു. ലഭ്യമായ ഏറ്റവും പുതിയ കണക്കുകൾ പ്രകാരം ഇതിനകം 1.14 മടങ്ങ് സബ്‌സ്‌ക്രിപ്ഷനാണ് രേഖപ്പെടുത്തിയിരിക്കുന്നത്. വൻകിട സ്ഥാപന നിക്ഷേപകരുടെ (ക്യു.ഐ.ബി) വിഭാഗത്തിൽ മാത്രം 3.68 മടങ്ങ് സബ്‌സ്‌ക്രിപ്ഷനാണ് ലഭിച്ചത്. തുടക്കം കുറിച്ച് ആദ്യ ദിവസം തന്നെ പത്ത് ലക്ഷത്തിലധികം അപേക്ഷകളാണ് കമ്പനിക്ക് ലഭിച്ചത്. ഈ മാസം ഒക്ടോബർ 23 വരെ നിക്ഷേപകർക്ക് ഐ.പി.ഒയിൽ അപേക്ഷ സമർപ്പിക്കാം.

ആങ്കർ നിക്ഷേപകർക്കായുള്ള ഓഹരി വിൽപനയിലും ജിയോയോടുള്ള നിക്ഷേപകരുടെ കിടമത്സരം വ്യക്തമായി പ്രകടമായി. ഏകദേശം 8,110 കോടി രൂപയുടെ ഓഹരികളാണ് ആങ്കർ നിക്ഷേപകർക്കായി മാറ്റിവെച്ചിരുന്നത്. എന്നാൽ ഇതിലേക്ക് ഞെട്ടിപ്പിക്കുന്ന രീതിയിൽ 2.5 ലക്ഷം കോടിയിലധികം രൂപയുടെ ബിഡുകളാണ് വന്നത്. ഇതോടെ ആങ്കർ വിഭാഗത്തിൽ മാത്രം ഡിമാൻഡ് 30 മടങ്ങിലധികം ഉയർന്നതായി കണക്കുകൾ പറയുന്നു. ഇതിൽ രാജ്യത്തെ ഏറ്റവും വലിയ പൊതുമേഖലാ ഇൻഷുറൻസ് സ്ഥാപനമായ ലൈഫ് ഇൻഷുറൻസ് കോർപറേഷൻ ഓഫ് ഇന്ത്യക്കാണ് (എൽ.ഐ.സി) ഏറ്റവും വലിയ ഓഹരി വിഹിതം ലഭിച്ചത്. ഏകദേശം 500 കോടി രൂപയുടെ ഓഹരികളാണ് എൽ.ഐ.സിക്ക് മാത്രമായി അനുവദിച്ചിട്ടുള്ളത്.

ഇതുവരെ രാജ്യത്തെ എക്കാലത്തെയും വലിയ ഐ.പി.ഒ റെക്കോർഡ് ഹ്യുണ്ടായ് മോട്ടോർ ഇന്ത്യയുടെ പേരിലായിരുന്നു. 2024ൽ പുറത്തിറങ്ങിയ ഹ്യുണ്ടായ് ഐ.പി.ഒയുടെ വലുപ്പം 27,870 കോടി രൂപയായിരുന്നു. എന്നാൽ ഇപ്പോൾ 30,213 കോടി രൂപ സമാഹരിക്കുന്നതിലൂടെ ജിയോ പ്ലാറ്റ്‌ഫോംസ് ഇന്ത്യയിലെ എക്കാലത്തെയും വലിയ ഐ.പി.ഒ എന്ന റെക്കോർഡ് സ്വന്തം പേരിൽ കുറിച്ചിരിക്കുകയാണ്. ഒരു ഓഹരിക്ക് 1,065 രൂപ മുതൽ 1,119 രൂപ വരെയാണ് കമ്പനി പ്രൈസ് ബാൻഡ് നിശ്ചയിച്ചിരിക്കുന്നത്.