ലഹരിമരുന്ന് കടത്ത്: പാകിസ്ഥാൻ പൗരന് 10 വർഷം തടവും 5,000 ദീനാർ പിഴയും വിധിച്ച് ബഹ്റൈൻ കോടതി
പ്രദീപ് പുറവങ്കര
മനാമ: ബഹ്റൈനിൽ കൊക്കെയ്ൻ, കഞ്ചാവ്, സിന്തറ്റിക് ലഹരിമരുന്നുകൾ എന്നിവ വിൽപന നടത്തിയ കേസിലെ പ്രതിയായ 26-കാരനായ പാകിസ്ഥാൻ പൗരന് ഹൈ ക്രിമിനൽ കോടതി 10 വർഷം തടവും 5,000 ദീനാർ പിഴയും വിധിച്ചു. ലഹരിമരുന്ന് ഒളിപ്പിക്കുന്നതിനിടെ തദ്ദേശീയനായ ഒരു സ്വദേശി പൗരൻ കാണിച്ച ധീരതയും സമയോചിതമായ ഇടപെടലുമാണ് പ്രതിയെ വലയിലാക്കിയത്.
ദുറാസിലെ മാതമിൽ നിന്ന് രാത്രിയിൽ പുറത്തിറങ്ങിയ ബഹ്റൈൻ പൗരനാണ് പ്രതി റോഡരികിലെ ഇടവഴികളിൽ സംശയാസ്പദമായ രീതിയിൽ സാധനങ്ങൾ ഒളിപ്പിക്കുന്നത് ശ്രദ്ധിച്ചത്. പരിശോധിച്ചപ്പോൾ ലഹരിമരുന്നാണെന്ന് വ്യക്തമായതോടെ, ഓടിപ്പോകാൻ ശ്രമിച്ച പ്രതിയെ ഇയാൾ പിന്തുടർന്ന് പിടികൂടി പോലീസിലറിയിക്കുകയായിരുന്നു.
സംഭവസ്ഥലത്തെത്തിയ പോലീസ് സംഘം പ്രതിയെ കൈയോടെ പിടികൂടി. പരിശോധനയിൽ ഇയാളുടെ പക്കൽ നിന്നും ടേപ്പ് ചുറ്റിയ മൂന്ന് ലഹരിമരുന്ന് പാക്കറ്റുകൾ കണ്ടെടുത്തു. തുടർന്ന് ഇയാളുടെ താമസസ്ഥലത്ത് നടത്തിയ തിരച്ചിലിൽ 908 ഗ്രാം ഹാഷിഷ് ഓയിൽ, 140 ഗ്രാം സി.ബി.ഡി ഓയിൽ, 56 ഗ്രാം കൊക്കെയ്ൻ, 13 ഗ്രാം കഞ്ചാവ്, ലഹരിമരുന്ന് ലായനി മുക്കിയ പേപ്പർ ഷീറ്റുകൾ, ഡിജിറ്റൽ ന്യൂതന ത്രാസുകൾ, പ്ലാസ്റ്റിക് കവറുകൾ എന്നിവയും പോലീസ് പിടിച്ചെടുത്തു.
അന്താരാഷ്ട്ര ലഹരിമരുന്ന് മാഫിയയുടെ ഭാഗമായി ബഹ്‌റൈനിലേക്ക് ലഹരിയെത്തിച്ച് 'ഡെഡ് ഡ്രോപ്പ്' (Dead Drop) വഴി വിതരണം ചെയ്യുന്ന സംഘത്തിലെ പ്രധാന കണ്ണിയാണ് ഇയാളെന്ന് ആന്റി നാർക്കോട്ടിക് ഡയറക്ടറേറ്റ് വ്യക്തമാക്കി. ശിക്ഷാകാലാവധി പൂർത്തിയാക്കിയ ശേഷം പ്രതിയെ രാജ്യത്തുനിന്ന് നാടുകടത്താനും പിടിച്ചെടുത്ത ലഹരിവസ്തുക്കൾ നശിപ്പിക്കാനും കോടതി ഉത്തരവിട്ടു.
adsasas
