ഇന്ത്യൻ എംബസി റിപ്പബ്ലിക് ദിനാഘോഷം സംഘടിപ്പിച്ചു; ബഹ്റൈൻ വിദേശകാര്യ മന്ത്രി മുഖ്യാതിഥിയായി പങ്കെടുത്തു
പ്രദീപ് പുറവങ്കര I മനാമ I ബഹ്റൈൻ:
മനാമ: ഭാരതത്തിന്റെ 77-ാം റിപ്പബ്ലിക് ദിനത്തോടനുബന്ധിച്ച് ബഹ്റൈനിലെ ഇന്ത്യൻ എംബസി പ്രൗഢഗംഭീരമായ സ്വീകരണം സംഘടിപ്പിച്ചു. ബഹ്റൈൻ വിദേശകാര്യ മന്ത്രി ഡോ. അബ്ദുല്ലത്തീഫ് ബിൻ റാഷിദ് അൽ സയാനി ചടങ്ങിൽ മുഖ്യാതിഥിയായിരുന്നു. ഇരു രാജ്യങ്ങളും തമ്മിലുള്ള ആഴത്തിലുള്ള സൗഹൃദത്തെ അദ്ദേഹം തൻ്റെ പ്രസംഗത്തിൽ എടുത്തുപറഞ്ഞു.
പ്രശസ്ത ബഹ്റൈനി റാപ്പർ മിസ്റ്റർ ഹുസാം അസീം (Flipperachi) ചടങ്ങിൽ പങ്കെടുത്തത് ശ്രദ്ധേയമായി. വന്ദേമാതരത്തിന്റെ 150-ാം വാർഷികത്തോടനുബന്ധിച്ച് ഉത്തരാഖണ്ഡ് സൊസൈറ്റി ഓഫ് ബഹ്റൈൻ അവതരിപ്പിച്ച പുല്ലാങ്കുഴൽ സംഗീതം സദസ്സിന് നവ്യാനുഭവമായി.
കൂടാതെ, ഇന്ത്യ-ബഹ്റൈൻ സൗഹൃദം പ്രമേയമാക്കി ഒരുക്കിയ 'ഇൻഡോ-ബഹ്റൈൻ ഫ്രണ്ട്ഷിപ്പ്' പെയിന്റിംഗ് എക്സിബിഷൻ ആഘോഷങ്ങൾക്ക് സാംസ്കാരിക തിളക്കം നൽകി.
പ്രമുഖരുടെ സാന്നിധ്യം പാർലമെന്റ് അംഗങ്ങൾ, മുതിർന്ന സർക്കാർ ഉദ്യോഗസ്ഥർ, വിവിധ രാജ്യങ്ങളിലെ നയതന്ത്ര പ്രതിനിധികൾ, സി.എം.എഫ് നേതൃത്വം, പ്രമുഖ വ്യവസായികൾ, ബഹ്റൈൻ ചേംബർ - ബഹ്റൈൻ ഇന്ത്യ സൊസൈറ്റി പ്രതിനിധികൾ തുടങ്ങി നാനൂറിലധികം വിശിഷ്ട വ്യക്തികൾ ചടങ്ങിൽ പങ്കെടുത്തു. മൂന്ന് പ്രവാസി ഭാരതീയ സമ്മാൻ പുരസ്കാര ജേതാക്കളും ഇന്ത്യൻ-ബഹ്റൈനി കമ്മ്യൂണിറ്റിയിലെ പ്രമുഖരും ആഘോഷങ്ങളുടെ ഭാഗമായി.
fgdg
