ഭീകരാക്രമണത്തിൽ പരിക്കേറ്റവരെ സന്ദർശിച്ച് ഷെയ്ഖ ഷൈമ ബിൻത് നാസർ അൽ ഖലീഫ
പ്രദീപ് പുറവങ്കര I ബഹ്റൈൻ
മനാമ: രാജ്യത്തെ ജനവാസ മേഖലകളിലും സിവിലിയൻ കേന്ദ്രങ്ങളിലും നടന്ന ഇറാനിയൻ ഭീകരാക്രമണത്തിൽ പരിക്കേറ്റ് സൽമാനിയ മെഡിക്കൽ കോംപ്ലക്സിൽ ചികിത്സയിൽ കഴിയുന്നവരെ റോയൽ ഹ്യൂമാനിറ്റേറിയൻ ഫൗണ്ടേഷനിലെ ഹ്യൂമാനിറ്റേറിയൻ വോളന്ററി ഇനിഷ്യേറ്റീവ്സ് മേധാവി ഷെയ്ഖ ഷൈമ ബിൻത് നാസർ ബിൻ ഹമദ് അൽ ഖലീഫ സന്ദർശിച്ചു. മാനുഷിക സന്നദ്ധ സംരംഭമായ 'ഷീം അൽ ഖൈർ' (Sheem Al Khair) പദ്ധതിയുടെ ഭാഗമായാണ് സന്ദർശനം നടത്തിയത്.
സിത്ര ഉൾപ്പെടെയുള്ള വിവിധ പ്രദേശങ്ങളിൽ നിന്നുള്ള പരിക്കേറ്റവരുമായി അവർ സംസാരിക്കുകയും അവരുടെ ആരോഗ്യസ്ഥിതി വിലയിരുത്തുകയും ചെയ്തു. ബഹ്റൈൻ രാജാവ് ഹിസ് മജസ്റ്റി ഹമദ് ബിൻ ഈസ അൽ ഖലീഫയുടെയും, രാജാവിന്റെ മാനുഷിക പ്രവർത്തനങ്ങൾക്കും യുവജനകാര്യങ്ങൾക്കുമുള്ള പ്രതിനിധി ഹിസ് ഹൈനസ് ഷെയ്ഖ് നാസർ ബിൻ ഹമദ് അൽ ഖലീഫയുടെയും ആശംസകളും സൗഖ്യനേർച്ചകളും അവർ പരിക്കേറ്റവരെ അറിയിച്ചു. എല്ലാവരും എത്രയും വേഗം പൂർണ്ണ ആരോഗ്യത്തോടെ കുടുംബങ്ങളിലേക്ക് മടങ്ങട്ടെ എന്ന് അവർ പ്രാർത്ഥിച്ചു.
സന്ദർശന വേളയിൽ പരിക്കേറ്റ കുട്ടികൾക്ക് ഷെയ്ഖ ഷൈമ സ്നേഹോപഹാരങ്ങൾ നൽകി. ഈ മാനുഷിക സ്പർശം കുട്ടികളിലും കുടുംബങ്ങളിലും ഏറെ സന്തോഷമുണ്ടാക്കി. ആരോഗ്യ മന്ത്രി ഡോ. ജലീല ബിൻത് സയ്യിദ് ജവാദ് ഹസൻ, ഗവൺമെന്റ് ഹോസ്പിറ്റൽസ് സി.ഇ.ഒ ഡോ. മറിയം അദബി അൽ ജലാഹ്മ എന്നിവരും സന്ദർശനത്തിൽ ഷെയ്ഖയെ അനുഗമിച്ചു.
gfgggdds
